От ыйын 10 күнүгэр Чурапчыга “Айылгы” сынньалаҥ киинигэр Саха сирин норуоттарын VII спортивнай оонньууларыгар кыайбыт, миэстэлэспит спортсменнары чиэстээһин буолла. Улуус дьаһалтатын физкултуураҕа уонна спорка салаатын начаалынньыга Иван Иванович Оконешников, улуус сүүмэрдэммит хамаандата хайдах таһымҥа кыттыбыттарын, ситиһиилэрин туһунан иһитиннэрии оҥордо.
Ол курдук, биһиги спортсменнарбыт бары көрүҥнэргэ барытыгар улуус аатын чиэстээхтик көмүскээтилэр. Көрсүһүүгэ улуус баһылыгын эбээһинэһин толорооччу Алексей Ноговицын уонна улуус дьокутааттарын Сэбиэтин бэрэссэдээтэлэ Афанасий Захаров миэстэлэспит бары спортсменнарга, кинилэр тириэньэрдэригэр, уопсай хамаандаларга анаммыт сэртипикээттэри туттардылар. Итини таһынан спорт салаатын аатыттан үлэлэспит бөлөх чилиэннэригэр, суоппардарга бочуотунай грамоталары, махтал суруктары туттардылар.
Бу тэрээһиҥҥэ биир дойдулаахтарын үөрүүлэрин үллэстэн, Ил Түмэн дьокутаата Семен Никитин, Дьокуускай куораттан Чурапчы улууһун Ытык сүбэтин салайааччы Иннокентий Аммосов, “Сириус” ХЭТ генеральнай дириэктэрэ Алексей Пинигин эҕэрдэ тыллары эттилэр.
Оттон спортсменнар ааттарыттан эр дьоҥҥо волейбол хамаандатын хапытаана, быйылгы оонньууларга чөмпүйүөн Альберт Бродников маннык чиэстээһин тэриллибитигэр махтанан туран, инники да буолар оонньууларга бука бары түмсэн, сомоҕолоһон үлэлииргэ улахан эппиэтинэс турарын уонна күүстээх дьарык күүтүллэрин эттэ.
edersaas.ru саайтка анаан Чурапчыттан Семен ЖЕНДРИНСКЭЙ.
Ааптар хаартыскаҕа түһэриилэрэ.
[vc_images_carousel]