Саха сирин национальнай-культурнай түмсүүлэрин VI-с Спартакиадалара футболунан түмүктэннэ. Быйылгы тэрээһин Арассыыйа күнүгэр уонна Саха сирин норуоттарын Ассамблеята тэриллибитэ 25 сылыгар ананна.
Санатан эттэххэ, күрэхтэһээччилэр урукку өттүгэр мас тардыһыытыгар, волейболга, остуол оонньууларыгар күөн көрсөллөрө. Быйыл күөн көрсүһүүнү футболунан түмүктээтилэр диэн А.Е.Кулаковскай аатынан норуоттар доҕордоһууларын дьиэтин пресс-сулууспата бэлиэтээн этэр.
Быйылгы түһүлгэҕэ түмсүүлэр хаһааҥҥытааҕар да турунан, күүскэ бэлэмнэнэн, хамаанда туруорунан өрө көтөҕүллүүлээхтик кыттыбыттар.
Эрбии тииһин курдук эгил-тэгил эриһиилээх күрэхтэһии уопсай түмүгүнэн, быйылгы спартакиада кыайыылаахтара маннык быһаарыллыбыттар:
1 миэстэ — СӨ Нуучча общината.
2 миэстэ – «Манас» кыргызтар диаспоралара.
3 миэстэ – СӨ Армяннар сойуустара.
Спартакиада СӨ Тас сибээскэ уонна норуоттар дьыалаларын, физкультура уонна спорт министиэристибэлэрин, А.Е.Кулаковскай аатынан норуоттар доҕордоһууларын дьиэтин, СӨ норуоттарын Ассамблеятын, «Тыва» национальнай общинатын, Баһылай Манчаары аатынан национальнай көрүҥнэргэ спорт киинин, «Дохсун» спорткомплекс, СӨ остуол оонньууларын федерациятын уо.д.а. өйөбүллэринэн, көмөлөрүнэн ыытыллыбыт.
Күрэхтэһии бары кыайыылаахтарын, кыттыылаахтарын А.Е.Кулаковскай аатынан норуоттар доҕордоһууларын дьиэтин кэлэктиибэ истиҥник эҕэрдэлээн туран, аныгыскы күөн күрэскэ өссө көхтөөхтүк кытталларыгар ыҥырар.
Хаартыскалар: А.Е.Кулаковскай аатынан норуоттар доҕордоһууларын дьиэтин пресс-сулууспата