Спартакиада-2022: Оҕунан ытыыга муҥутуур кыайыылаах убаһанан наҕараадаланыаҕа

Уус Алдан Бороҕонугар буола турар Саха сирин норуоттарын спортивнай оонньууларын бырагырааматыгар оҕунан ытыы баар. Күрэхтэһиини таһынан бу көрүҥҥэ муҥутуур кыайыылааҕы быһааран, чөмпүйүөн убаһанан наҕараадаланыаҕа диэн сүрүн судьуйа Борис Олесов иһитиннэрдэ.

Сүрүн судьууйа Борис Олесов:

— Оҕунан ытыы көрүҥэр финал чиэппэрэ буола турар. Барыта 64 кыттааччылаахпыт:  классическай оҕунан 32 ытааччы уонна  блочнай оҕунан 32 ытааччы баар. Бүгүн күммүт тыаллаах буолла. Ол даҕаны буоллар, спортсменнар бары усулуобуйаҕа дьарыктаналлар, күрэхтэһии ардахтан, тыалтан тохтообот.

Бүгүн сүрүн күрэхтэһиибит кэнниттэн оҕунан ытыыга муҥутуур кыайыылааҕы быһаарыахпыт. Бу киирсиибитин Саха АССР тэриллибитэ 100 сылыгар анаан ыытабыт. Онон ытааччылар 100 миэтэрэ тэйиччиттэн туран ытыахтара. Кыайыылаахха норуот маастара, Уус Алдан улууһун уонна Байаҕантай нэһилиэгин бочуоттаах олохтооҕо Роман Готовцев убаһа туттарыаҕа.