“Союз-2.1б” таһаарааччы аракыатаны ыытыыга бэлэмнэнии туһунан кэпсэттилэр

«Восточнай космодромтан» таһаарааччы аракыата ыытылларынан, өрөспүүбүлүкэҕэ туһааннаах сулууспалар төһө бэлэмнээхтэрий? Ол туһунан манна ааҕыҥ.

Ахсынньы 15 күнүгэр Саха сирин Бырабыыталыстыбатын Бэрэссэдээтэлэ Алексей Колодезников ВКС эрэсииминэн “Восточнай” космодромтан “OneWeb” космическай аппарааттаах “Союз-2.1б” таһаарааччы аракыатаны (ракета-носитель) ыытыыга оройуоннар төһө бэлэмнээхтэригэр анаммыт мунньаҕы ыытта.

Санаттахха, эрдэ “Восточнай” космодромтан 5 төгүл “Союз-2” аракыатаны таһаарааччы ыытыллан, 983 №-дээх Алдан оройуонугар уонна 985 №-дээх Бүлүү улууһугар түспүтэ.

Бу сырыыга ахсынньы 18 күнүгэр ыытыллара күүтүллэр. Уонна тобохторо түһэр оройуоннарынан 873 №-дээх Алдан оройуона уонна 875 №-дээх Кэбээйи улууһа буолаллар.

Бу түһүөхтээх таһаарааччы аракыата улахан буортута суох, манна двигателлэрэ тупсаҕай гына оҥоһуллубуттар, салаллыытын тиһигэ эмиэ аныгылыы, оттугар кислород уонна керосин туһаныллар.

Бу ыытыы сир хайа баҕарар муннугуттан Интэриниэккэ түргэнник уонна чэпчэки сыанаҕа киирэр кыаҕы биэрэр OneWeb космическай аппарааттарын орбитаҕа таһаарар сыаллаах оҥоһуллар.

Сүбэ мунньахха аракыата тобохторо түһүөхтээх оройуоннара төһө бэлэмнээхтэрин туһунан “ЦЭНКИ” — НИИ СК филиалын түһүөхтээх оройуоннарын отделениетын исписэлииһэ Александр Савеленок иһитиннэрии оҥордо. Кини этэринэн, ахсынньы 11 күнүгэр оробуочай бөлөх куттал суох буолуутун хааччыйыыга туһаныллар тиэхиньикэни Сангаар 875 №-дээх оройуонугар аҕалбыт, ахсынньы 14 күнүгэр хонуутааҕы лааҕыры бэлэмнээбиттэр. Бүгүн араадьыйа-локационнай ыстаансыйаны хомуйбуттар.

Савеленок иһитиннэрбитинэн, Сангаарга бөртөлүөт бэлэмнэммит, чинчийии ыытыллыахтаах былаһааккаларыгар аракыата ыытыллыан иннинэ боруобалары ылыахтара, туһааннаах оройуоҥҥа дьон сылдьарыгар түбэстэхтэринэ бу сиртэн илдьиэхтэрэ.    Бөртөлүөт өссө биир рейсинэн Арассыыйа ЫБММ СӨ управлениетын бэрэстэбиитэллэрин Сэбээн Күөлгэ илдьиэхтээх.

Кылаабынай исписэлиис эппитинэн, сарсыҥҥы күнүгэр көрдөөһүн саҕаланыахтаах. “Күн-дьыл туран биэрдэҕинэ, 19 чыыһылаттан таһаарааччы аракыата тобохторо түспүт оройуоннарыгра баран боруобалары ылыахпыт уонна тэҥинэн тобохтору көрдүөхпүт”, — диэтэ Савеленок.  

Нэһилиэнньэҕэ уонна экэниэмикэ эбийиэктэригэр куттал суох буолуутун хааччыйыы боппуруоһунан СӨ нэһилиэнньэ олоҕун-дьаһаҕын хааччыйыыга судаарыстыбаннай кэмитиэтин бэрэссэдээтэлэ Дмитрий Лепчиков иһитиннэрии оҥордо. Кини туһааннаах оройуоннарга бу боппуруоска эппиэтинэстээх дьон анаммыттарын эттэ.  Ахсынньы 14 күнүгэр  Алдан уонна Кэбээйи оройуоннарыгар быыһааччылар бөлөхтөр ыытыллыбыт. Сөптөөх тиэхиньикэнэн хааччыллыбыттар. СӨ Быыһыыр сулууспата тустаах оройуоннарга куттал суох буолуутун хааччыйарга бэлэм. Госкэмитиэт ахсынньы 7 күнүттэн ыла нэһилиэнньэҕэ сонуннары киэҥник тарҕатар сириэстибэлэр, социальнай тиһиктэр көмөлөрүнэн иһитиннэриини, сэрэтиини оҥоро сылдьар.   Арассыыйа ЫБММ СӨ управлениета Алдан уонна Кэбээйи оройуоннарын олохтоохторугар смс нөҥүө иһитиннэриилэри ыыппыт. Бу оройоуннар баһылыктарыгар таһаарааччы аракыатаны хаһан, хас чааска ыыталларын туһунан тиэрдибиттэр.

Маны сэргэ СӨ Бырабыыталыстыбатын уонна Хааччыйыыга судаарыстыбаннай кэмитиэт дьиҥ саайтарыгар “Восточнай” комсодромтан ыытыллыахтаах таһаарааччы аракыата туһунан иһитиннэрии тахсыбыт.

Тулалыыр эйгэҕэ дьайыытыгар “ЦЭНКИ” тэрилтэни кытта экологияҕа чинчийии ыытылларын туһунан  СӨ экологияҕа, айылҕаны туһаныыга уонна ойуур хаһаайыстыбатыгар миниистирин бастакы солбуйааччы Семен Яковлев эттэ.

Миниистири бастакы солбуйааччы иһитиннэрбитинэн, бүгүн биир бөлөх хайы-үйэ Алдан оройуонунааҕы кэтээн көрөр былаһааккаҕа боруоба ылан, Дьокуускайга лабораторияҕа ыытыаҕа.  Иккис бөлөх ахсынньы 16 күнүгэр Кэбээйи улууһугар боруобаны ылыаҕа. Онтон ракета ыытыллыбытын кэннэ хаттаан ылыахтара. Балар түмүктэрэ ахсынньы 25 күнүн эргин биллиэҕэ.

Мунньаҕы түмүктүүрүгэр Алексей Колодезников өрөспүүбүлүкэ бары сулууспаларын бэлэмнээх буолуу эрэсиимигэр киллэрэргэ эттэ. “Бу тэрээһиҥҥэ олус эппиэтинэстээхтик сыһыаннаһаргытыгар көрдөһөбүн”, — диэтэ бастакы вице-премьер.

Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата

Бэлэмнээтэ Женни Стрюкова

Хаартыска: тустаах саайтан