Саха сирин олохтоохторо оптуорунньук сарсыарда турбуттара – социальнай ситимнэр үлэлээбэттэр этэ, ол эрээри, бытааннык да буоллар, холбонон бардылар. Бу түүн аан дойду үрдүнэн Facebook, Instagram уонна WhatsApp ситимнэр үлэлэригэр харгыс тахсан, тохтуу сырыттылар. Хата, ону түүн буолан, Саха сиригэр билбэккэ да хааллыбыт.
“Фейсбук” сыһыарыы үлэтэ Европаҕа, Азияҕа, Хотугу, Соҕурууҥҥу Америкаҕа харгыстана сырытта. Кинилэргэ үксүлэригэр бэнидиэнньик этэ. WhatsApp Inc. хампаанньа ыстаап-кыбартыыратыгар үлэһиттэр систиэмэ үлэтигэр кыһалҕалар үөскээбиттэрин иһитиннэрбиттэрэ. Арассыыйаҕа “Вконтакте” ситим үлэтэ эмиэ харгыстары көрүстэ.
Кыһалҕа төрүөтүнэн маршрутизация глобальнай табылыыссаларыттан DNS-суруктар сүппүттэрэ буолар диэн киберисписэлиистэр сабаҕалыыллар. Хакердар атаакалара буолуо диэн этиини бакаа утардылар.
Америкаҕа Google, Twitter, Gmail, Snapchat, YouTube, Netflix, Viber, Zoom платформаларга холбонуу кыһалҕалаах буолла. Ону тэҥэ, Bank of America үлэтэ эмиэ кэһилиннэ. Мантан сибээстээн, Facebook, Twitter, Alphabet, Amazon курдук улахан хампаанньалар аахсыйаларын сыаната лаппа түстэ. Холобур, Марк Цукерберг биир күн иһигэр миллиардынан дуолларын сүтэрдэ диэн суруйаллар.
Ангелина Васильева, “Саха сирэ” хаһыат, edersaas.ru
Хаартыска: kapital.kz