Социальнай такси инбэлииттэри таһар

Бөлөххө киир:

Дьокуускайга 2019 сылтан “Социальнай такси” диэн анал сулууспа үлэлиир. Кинилэр кыайан хаампат уонна инбэлиит дьону таһар, көмөлөһөр соруктаахтар. Бу сулууспа үлэлииригэр бүддьүөттэн 2,5 мөлүйүөн солкуобай көрүллэр.

Кэлээскэлээх инбэлииттэр көннөрү таксины ыҥыраллара элбэх кыһалҕаны үөскэтэр. Үгүс такси массыыналарыгар кэлээскэ баппат. Ол иһин көмөлөһөр, микрооптуобуска киллэрэр-таһаарар анал үлэһиттэрдээх сулууспа баара олус туһалаах. Сакаастыыр дьон куоракка олохтоммут сыананы (150 солкуобай кэриҥин) төлүүллэр. Арыаллыыр дьон эмиэ барсыахтарын сөп.

Оттон үлэһиттэр массыынаттан түһэрэн баран, баран хаалбаттар, дьиэҕэ киирэригэр көмөлөһөллөр. Холобур, лифт да суоҕун иһин, үөһээ этээскэ баар кыбартыыратыгар, оронугар диэри киллэрэн биэрэллэр. Кыайан хаампат киһиэхэ бу улахан кыһалҕа буоллаҕа эбээт. Көннөрү таксилар маннык өҥөнү оҥорор буоллахтарына, 2000 солкуобайтан кыраны көрдөөбөттөр. 

Социальнай такси” сулууспаҕа чааһынай урбаанньыттар үлэлииллэр, кинилэр Бүтүн Арассыыйатааҕы инбэлииттэр уопсастыбаларын Дьокуускайдааҕы салаатын кытары дуогабар түһэрсэллэр.

Ангелина Васильева, “Саха сирэ” хаһыат, edersaas.ru

Хаартыска: якутск.рф

+1
0
+1
0
+1
0
+1
0
+1
0
+1
0
+1
0