Доруобуйа Маны аах

Социальнай ситимнэргэ тарҕаммыт видео төрүөтүн быһаарыахтара

Бэҕэһээ, атырдьах ыйын 23 күнүгэр, Саха сирин социальнай ситимнэригэр Дьокуускай куорат 3 №-дээх балыыһатыгар невролог-быраас бэйэтин кэбиниэтигэр уонтан тахса киһини биирдэ мунньан көрбүтүн туһунан видео тарҕанна, федеральнай ханаал сонуннарыгар көрдөрүллэ оҕуста.

edersaas.ru

Невролог-быраас кэбиниэккэ симиллэн турар дьону илиилэрин көтөҕөллөрүгэр, онтон муннуларын төбөтүн таарыйалларыгар этэр. Социальнай ситимҥэ бу видеоны көрбүт дьон санаатын хото үллэһиннэ.  “Ыспыраапка эрэ ылаары кэлбит дьон уочаракка туруохтарын ыарырҕатан, баҕар, бэйэлэрэ көрдөспүттэрэ буолуо” диэн сабаҕалааһыннар эмиэ бааллар. Сорохтор видеоны устубут киһини мөҕүттэллэр. Ол гынан баран, мэдиссиинискэй үлэһиккэ эппиэттээбэт дьайыыларга тустаах министиэристибэ  эмиэ эппиэти сүгэр.

Бу туһунан СӨ доруобуйа харыстабылын миниистирэ Лена Афанасьева: “Дьокуускай куорат балыыһатыгар тахсыбыт балаһыанньаны мэдиссиинэ үлэһитигэр сөбө суоҕунан ааҕабын. Биллэн турар, биһиги бэрэбиэркэни ыытыахпыт, туох төрүөттэн маннык буолбутун билээри бырааһы кытары кэпсэтиэхпит. Биһиги мэдиссиинэ көмөтө хаачыстыбалаах буоларыгар болҕомтолоохтук сыһыаннаһабыт уонна  хаачыстыбата суох көмө оҥоһуллар түгэнигэр Доруобуйа харыстабылын Биир кэлим киинигэр – 122 нүөмэргэ эрийэргитигэр көрдөһөбүт. Мин балыыһа кылаабынай бырааһыгар бу түгэҥҥэ баар эмтэнээччилэри кытары сибээстэһэригэр уонна мэдиссиинискэй көмөнү ыларга балыыһаҕа хос ыҥыралларыгар сорудахтаатым», — диэтэ.

Надежда ЕГОРОВА, «Саха сирэ», edersaas.ru

Хаартыска СӨ Доруобуйатын харыстабылын министиэристибэтин саайтыттан

0
0
Telegram Whatsapp