Социальнай страховкалааһын фондатыгар сытыы боппуруостар тула кэпсэттилэр
Бэҕэһээ, тохсунньу 30 күнүгэр, Социальнай страховкалааһын эрэгийиэннээҕи фондатыгар «Обеспечение техническими средствами реабилитации и санаторно-курортным лечением льготной категории граждан» диэн тиэмэҕэ “төгүрүк остуол” ыытылынна.
edersaas.ru
“Төгүрүк остуолга” СӨ киһи быраабыгар боломуочунай Сардана Гурьева, СӨ оҕо быраабыгар боломуочунай Анна Соловьева, Бүтүн Арассыыйатааҕы инбэлииттэр уопсастыбаларын түмсүүлэрин, көрбөттөр уопсастыбаларын, «Харысхал” аһымал фондатын, инбэлиит-оҕолор төрөппүттэрин уопсастыбаларын бэрэстэбиитэллэрэ кыттыыны ыллылар.
Бүгүҥҥү туругунан фонд эрэгийиэннээҕи салаатыгар учуокка 13 тыһыынча киһи турар. Бу дьон судаарыстыба социальнай страховкалааһыныттан араас көмөнөн туһаналлар. Көрсүһүү кэмигэр инбэлииттэр доруобуйаларын бөҕөргөтөллөрүгэр тиэхиньиичэскэй сириэстибэлэринэн хааччыллыыларын боппуруоһа көтөҕүлүннэ.
Социальнай бырагыраамалар отделын начаалынньыга Олег Неустроев ааспыт сылга тиэхиньиичэскэй сириэстибэлэринэн хааччыллыы, санаторнай-курортнай эмтэнии, Доруобуйа харыстабылын салаатынан айан толуонунан туһаныы туһунан иһитиннэрии оҥордо.
Дьокуускай куоракка олорор инбэлииттэр уопсастыбаларын бэрэссэдээтэлэ Екатерина Емелина: «Былырыын 2 тыһыынча кэриҥэ киһини эмтэтэ ыыппыппыт. Ол иһигэр 212 оҕону. Социальнай страховкалааһын эрэгийиэннээҕи фондата “Госуслуги” портал нөҥүө сайаапкалары хомуйууга үлэлээн эрэр. Онон фонда оҥорор өҥөлөрүнэн ыраахтан да олорон туһаныахха сөп. Бу инбэлиит киһиэхэ олус табыгастаах. Сырыы ахсын фондаҕа баран иһэр ыарахан» , — диэн санаатын үллэһиннэ.
Социальнай страховкалааһын эрэгийиэннээҕи фондатын пресс-сулууспата
edersaas.ru