Социальнай остолобуойга аҕам саастаах соҕотох дьоҥҥо бырааһынньык тэрийдилэр
Дьокуускай куорат социальнай остолобуойугар соҕотох хаалбыт аҕам саастаах дьоҥҥо Саҥа дьыл бырааһынньыгын тэрийдилэр.
Ону сэргэ, бу остолобуойга дьиэттэн кыайан тахсыбат соҕотох дьоҥҥо уонна кыаммат араҥа оҕолоругар саҥа дьыллааҕы бэлэх хомуйдулар. Ахсынньы 28 күнүгэр социальнай остолобуой үлэһиттэрэ уонна волонтердар бырааһынньыктааҕы эбиэттэри уонна саҥа дьыллааҕы бэлэхтэри тарҕатыахтара. Социальнай остолобуой дириэктэрэ Ирина Гузова бэлэх хомуйуутугар бар дьону көмөҕө ыҥырар:
— Ким төһө кыахтааҕынан көмөлөһүҥ, минньигэс бэлэхтэринэн. Оонньуурдар олох тиийбэттэр. Маны таһынан тохсунньу 7 күнүгэр инбэлиит-оҕолорго анаан саҥа дьыл харыйатын тула бырааһынньык тэрийиэхпитин баҕарабыт. Эһиги көмөтө суох уустук буолсу, — диэн санаатын үллэһиннэ.
Социальнай остолобуой Дьокуускай куорат Новопортовской уулуссатын 3 дьиэтигэр баар. Бу нүөмэргэ эрийэн сибээскэ тахсыаххытын сөп: 8914274 39 42
Ахсынньы 19 күнүгэр соҕотох аҕам саастаахтарга аналлаах бырааһынньыкка уопсайа 36 киһи сырытта. Араас оонньуулар, кэнсиэр ыытыллан аҕам саастаахтар бэркэ сэргэхсийбиттэр.
Ульяна ЗАХАРОВА.
Хаартыска интэриниэт ситимиттэн ылылынна.