Бэс ыйын 8 күнүгэр Социальнай үлэһит күнэ бэлиэтэнэр. Бу күн 2000 сыллаахха РФ бэрэсидьиэнэ Владимир Путин ыйааҕынан олохтоммута. Оттон судаарыстыбаннай социальнай көмүскэл систиэмэтэ олохтоммут күнүнэн 1701 сыл бэс ыйын 8 күнүн ааттыыллар. Бу күн Петр I Сибэтиэй Патриархат ыарыһахтарга, дьадаҥыларга, кырдьаҕастарга аналлаах богадельнялары арыйар туһунан ыйааҕа тахсыбыта.
edersaas.ru
Билигин судаарыстыба нэһилиэнньэ олоҕун хаачыстыбатын тупсарыыны, социальнай бэлиитикэни инники күөҥҥэ тутар. Бүгүҥҥү күҥҥэ Үлэ, социальнай сайдыы министиэристибэтин иһинэн 96 тэрилтэ, ол иһигэр 88 судаарыстыбаннай уонна 8 муниципальнай, үлэлиир. Бу тэрилтэлэргэ 5,2 тыһыынча киһи үлэлии-хамсыы сылдьар. Cоциальнай сулууспаларга сыл устата 300 тыһыынчаттан тахса киһи тиийэн, көмө көрдүүр. Өрөспүүбүлүкэ социальнай сулууспалара аныгы кэм ирдэбиллэрин тутуһан, үлэҕэ саҥа ньымалары көрдүүллэр.
Социальнай бэлиитикэҕэ биир сүрүн хайысханан нэһилиэнньэ кыаммат араҥатын хааччыйыы буолар. Биир оннук бөдөҥ тэрилтэнэн Өрөспүүбүлүкэтээҕи социальнай хааччыйыы кэлим киинэ буолар. Манна Бүлүүтээҕи, Булуҥнааҕы, Хаҥаластааҕы, Үөһээ Халыматааҕы филиаллар, кырдьаҕастары, инбэлииттэри дьиэлэригэр көрөр-истэр 4 салаа, дьиэҕэ социальнай-мэдиссиинэ өҥөтүн оҥорор анал салаа, “Тирэх” социальнай адаптация салаата, “Эрчим” социальнай реабилитация салаата, “Кырдьаҕастар уонна инбэлииттэр анал дьиэлэрэ” салаа, кырдьаҕастары, инбэлииттэри суһал социальнай хааччыйыы салаата киирэллэр.
Онлайн бырааһынньык
Быйылгы эпидемиологическай балаһыанньа үөскээбитинэн, өрөспүүбүлүкэҕэ Социальнай үлэһит күнүн онлайн эрэсиимҥэ бэлиэтээтилэр.
Пандемия кэмигэр социальнай эйгэ үлэһиттэрэ ZOOM платформаны үчүгэйдик баһылаатылар. Идэлээх күн бырааһынньыгын үөрүүлээх мунньаҕын видеокэмпириэнсийэ эрэсииминэн буолла. Манна өрөспүүбүлүкэ араас муннуктарыттан сүүстэн тахса киһи кытынна. Бу күн бастыҥ үлэһиттэр судаарыстыбаннай наҕараадалары туттулар. Кэмпириэнсийэҕэ Ил Дархан Айсен Николаев кыттыыны ылла.
Социальнай ситимнэргэ өрөспүүбүлүкэ салалтата, урукку миниистирдэр эҕэрдэлииллэр. “Социальнай үлэһит идэтин тоҕо талбыппыный?”, “Саха сирин социальнай сулууспатын историята” аахсыйалар киэҥник ыытылыннылар. Министиэристибэ уонна тэрилтэлэр идэлээх сойуустара социальнай эйгэ үлэһиттэрин оҕолоругар анаан “Социальнай үлэһит оҕолорбут харахтарынан” уруһуй күрэһин тэрийэн ыыттылар.
Идэлээх бырааһынньыктарын иннинэ социальнай үлэһиттэр “Саха сирин киэн туттуута” бириэмийэҕэ кыттан, куоластаан, үлэлэрин-хамнастарын дьоҥҥо-сэргэҕэ билиһиннэрбиттэрэ.
Сотору кэминэн Өлүөхүмэҕэ психоневрологическай диспансер дьиэтин сыбаайатын үөрүүлээх быһыыга-майгыга түһэрии былааннанар.
Ангелина Васильева, «Саха сирэ» хаһыат, edersaas.ru
Хаартыска: интэриниэттэн.