“Мин Сахам сирэ” диэн социальнай каартаны билиҥҥитэ 43 тыһыынча киһи сакаастаан, туһана сылдьар. Бу каартанан маҕаһыыннарга кэшбек (харчыны төннөрүү), култуура, спорт тэрилтэлэригэр чэпчэтиилэри ылыахха, оптуобуска айаны чэпчэки сыананан төлүөххэ сөп.
Ону тэҥэ, бу каартаҕа социальнай төлөбүрдэри, биэнсийэни, о.д.а. түһэртэриэххэ сөп. Киһи туох социальнай чэпчэтиинэн туһаныахтааҕа биллэ-көстө сылдьар, тоҕо диэтэр, СӨ үлэҕэ, социальнай сайдыыга министиэристибэтэ бу каартаны таһаарбыт “Алмаасэргиэнбааҥҥа” тустаах дааннайдары биэрэ олорор. Онон каартанан туһанар киһи чэпчэтии ыларыгар докумуонун көрдөрө сатаабат, бу өттүнэн табыгастаах. Холобур, элбэх оҕолоох дьиэ кэргэн “Якутия” авиахампаанньаттан эбии докумуону көрдөрбөккө эрэ, субсидиялаах билиэти ылыан сөп.
Билигин тыһыынчаттан тахса тэрилтэ (ол иһигэр 80-тан тахса култуура уонна спорт тэрилтэтэ) бырайыак партнердарынан буолаллар. Социальнай каарта кыаҕа өссө кэҥээн иһиэҕэ. Мэдиссиинэ, үөрэх, олох-дьаһах хаһаайыстыбатын тэрилтэлэригэр, о.д.а. чэпчэтиилэр, бонустар баар буолуохтара.
Премьер Андрей Тарасенко сорудаҕынан, өрөспүүбүлүкэ олохтоохторугар биир кэлим цифровой сервис кэнсиэпсийэтэ оҥоһуллубута. Ол чэрчитинэн, 2021 сыл от ыйыттан маннык бырайыак Дьокуускай, Нерюнгри, Ньурба, Мииринэй, Бэрдьигэстээх олохтоохторугар анаан, алтынньыттан өрөспүүбүлүкэ бары улуустарыгар үлэлиир.
Ангелина Васильева, “Саха сирэ” хаһыат, edersaas.ru
Хаартыска: sakhagov.ru