2020 сыл бүтэһигэр Саха сирин олохтооҕун Биир кэлим цифровой сервис кэнсиэпсийэтэ бигэргэтиллибитэ. Бу судаарыстыбаннай өҥөнү оҥоруу хаачыстыбатын тупсарыыга туһаайыллар. Онон социальнай каарта диэн оҥоһулунна.
Кэнсиэпсийэ чэрчитинэн, Саха сирин олохтооҕун цифровой сервиһин 1-кы түһүмэҕэр тырааныспар сыһыарыыта, идетификационнай сыһыарыы, социальнай дисконт баар буолуохтара.
Бу сыһыарыылар 2021-2022 сылларга оҥоһуллан, чэпчэтиинэн туһанар кэккэ дьоҥҥо: сэрии, тыыл бэтэрээннэригэр, инбэлииттэргэ, элбэх оҕолоох дьиэ кэргэттэргэ, уо.д.а. тарҕатыллыахтара. Барыта 200 тыһыынча социальнай каартаны таһаарарга былаанныыллар.
Билигин тырааныспар сыһыарыыта Дьокуускай куоракка эрэ үлэлиир. Улуустарга чэпчэтиинэн туһанар дьон кумааҕы докумуону көрдөрдөхтөрүнэ эрэ, чэпчэтии оҥоһуллар. Социальнай каарта киирдэҕинэ, кумааҕы билиэт наадата суох буолар.
2021 сылга бу бырайыак Дьокуускайга, Нерюнгригэ, Мииринэйгэ, Ньурбаҕа уонна Горнайга үлэлиэҕэ.
Социальнай каартаҕа киһи ханнык чэчпэтиинэн, көмөнөн, өҥөнөн туһанара көстөр. Хас биирдии улуус, куорат өссө ханнык көмөнү, чэпчэтиини оҥорорун быһаарар. Оччотугар, холобур, элбэх оҕолоох дьиэ кэргэн көмөнү ыларыгар, кумааҕы докумуонунан бигэргэтэрэ ирдэммэт.
Иккис түһүмэҕэр (2023-2025 сс.) сервис кэҥиэхтээх. Чэпчэтиинэн туһанар дьон ханнык категорияҕа хапсалларынан, көмө, чэпчэтии нобуора тус-туспа буолар. Кэлин хомунаалынай, үөрэҕирии уонна мэдиссиинэ өҥөлөрүн оҥорор сыһыарыылар оҥоһуллуохтара.
Социальнай каарта 2021 сыл от ыйын 1 күнүттэн тахсыаҕа. Бу маннык каартаны ылбыт киһи саҥа технологиялары туһанан, кумааҕы докумуоннара суох, өҥөнү ылара быдан чэпчиэҕэ диэн Үлэ, социальнай сайдыы министиэристибэтэ иһитиннэрэр.
Ангелина Васильева, “Саха сирэ” хаһыат, edersaas.ru
Хаартыска: sakha.gov.ru