Өрөспүүбүлүкэҕэ бастакы социальнай каарталары туттардылар. Саха сирин олохтооҕун социальнай каартата биир кэлим цифровой сервис быһыытынан, араас чэпчэтиилэри, төлөбүрдэри ыларга көмөлөһөр.
От ыйын 1 күнүттэн алтынньы 1 күнүгэр диэри пилотнай бырайыак быһыытынан Дьокуускай, Нерюнгри, Мииринэй, Ньурба куораттар уонна Бэрдьигэстээх сэлиэнньэтин олохтоохторо 14 саастарын туолбут уонна социальнай төлөбүрдэринэн туһанар бырааптаах буоллахтарына, каартаны ылар кыахтаахтар. Ол эбэтэр, биэнсийэлээхтэр, элбэх оҕолоох ыаллар, тыыл, үлэ бэтэрээннэрэ, сэрии кэмин оҕолоро, уо.д.а.
Бу каарта син биир баан каартатын курдук дьайыылаах. Холобур, аҥаардас даҕайыынан эрэ төлөһүөххэ сөп. Чэпчэтиинэн туһанар быраабы мэктиэлиир дастабырыанньа курдук туттуллар. Мусуойдарга, бассейнҥа, кэнсиэргэ, аптекаҕа, зоопаркаҕа, парикмахерскайга, о.д.а. киирэргэ чэпчэтиини мэктиэлиир.
Ону тэҥэ, Биир кэлим социальнай айан билиэтин оннугар туһаныахха сөп. Социальнай каартаҕа биэнсийэни, атын да төлөбүрдэри түһэртэриэххэ сөп.
Сайабылыанньаны www.card.sakha.gov.ru, e-yakutia.ru эбэтэр www.картажителяякутии.рф порталлар нөҥүө биэриэххэ сөп. Эбэтэр, “Алмаасэргиэнбааҥҥа” эрдэттэн суруйтаран баран, тиийэн ылаҕын. Манна пааспар, СНИЛС, хаартыска ирдэнэр.
Каартаны ыларга харчы төлөнүллүбэт, сыллааҕы хамыыһыйа диэн эмиэ суох. Ол эрээри, сүтэрдэххэ, эбэтэр, ааккын уларыттардахха, иккистээн оҥороллоругар 500 солкуобайы төлүөххэ наада. Бу сыл бүтүөр диэри өрөспүүбүлүкэ бары муннуктарыгар олорор, чэпчэтиинэн туһанар дьоҥҥо барыларыгар оҥоһуллуоҕа.
Урут тырааныспар сыһыарыыта Дьокуускайга эрэ үлэлиир буоллаҕына, билигин бары улуустарга үлэлиир буолуоҕа. Бэл диэтэр, субсидиялаах авиабилиэттэри атыылаһар кыах үөскүөҕэ.
От ыйын 8 күнүгэр Ил Дархан Айсен Николаев бастакы биир цифровой сервистээх социальнай каарталары туттарбыта. Кини илиититтэн каарталары элбэх оҕолоох дьиэ кэргэттэр уонна 30-тан тахса сыл бииргэ олорбут, “За любовь и верность” мэтээлинэн наҕараадаламмыт ыаллар туппуттара.
Бырайыак өссө кэҥээн иһиэҕэ. Өссө элбэх чэпчэтиилэри биэрэргэ урбаанньыттары кытары кэпсэтии барар.
Ангелина Васильева, «Саха сирэ» хаһыат, edersaas.ru
Хаартыска: sakhagov.ru