Саха сиригэр Биир кэлим цифровой сервис каартатын киллэрээри гыналлар. Бу туһанарга олус табыгастаах каарта буолуоҕа.
Бу каарта көмөтүнэн Саха сирин олохтоохторо судаарыстыбаннай көмөнү докумуоннарын да биэрбэккэ эрэ, ылыахтарын сөп. Оптуобуска айан төлөбүрүн төлүөххэ, атыы, өҥө тэрилтэлэриттэн араас чэпчэтиилэринэн туһаныахха сөп. Ону тэҥэ, бу каартаҕа социальнай төлөбүрдэр түһэллэр.
Онон, каарта аатын, дизайнын, логотибын оҥорорго куонкурус биллэрдилэр. Куонкуруска ким баҕарар кыттар кыахтаах.
Кыайыылаах 50 тыһыынча солкуобайы уу харчынан ылыаҕа. 2-с миэстэлээх – 25 тыһыынча солкуобайы, 3-с миэстэлээх – 10 тыһыынча солкуобайы ылыахтара.
Куонкуруска кыттыы сайаапкатын One click Yakutia https://yakutia.click/ порталга алтынньы 5 күнүттэн алтынньы 17 күнүгэр диэри биэриэххэ сөп.
Биэс финалист үлэтэ СИА информационнай ааҕыныстыба саайтыгар тахсыаҕа. Кыайыылааҕы алтынньы 19-23 күннэригэр куоластааһын түмүгүнэн быһаарыахтара. Онон кыайыылаах уонна миэстэлэспит дьон ааттара алтынньы 24 күнүгэр биллиэҕэ.
Ангелина Васильева, «Саха сирэ» хаһыат, edersaas.ru
Хаартыска: интэриниэттэн