Бэлиитикэ Нацбырайыактар Тыа хаһаайыстыбата

Социальнай көмөнү көдьүүстээхтик туһанан

Мэҥэ Хаҥалас улууһун Нөөрүктээйи нэһилиэгин олохтооҕо Светлана Михайлова дьиэтигэр эргийэн кэлбит кыһыны эмиэ оһоҕун көмөлөһүннэрэн сылааһын хааччынан туоруур буолбут.

Тоҕо “көмөлөһүннэрэн” диир буоллахха, “Красноярскэнергокомплект” эргиэн-бырамыысыланнас хампаанньата ХЭУо электрохочуолун быйылгыттан дьиэни сылытыыга туттар. Билэр дьон сүбэлэринэн истиэнэҕэ ыйанар барыйаанын ылбыт. Ол гынан, “уоту сиир эбит, кыһынын улахан тымныыларга оһохпун син биир оттор эбиппин”, — диир. Ол да буоллар, ZOTA хочуолугар алта радиатора холбонон тураллар. Кыһыны кыстыырга тыраахтар икки бырысыаба оттугун 10-нуу тыһыынча солкуобайга атыылаһан хааччыммыт.


Электроуотунан ититинии барыйаанын талбыт сүрүн биричиинэтинэн гаас ситимигэр холбоноро-холбоммото биллибэтэ буолбут. Бөһүөлэккэ кини дьиэтиттэн саамай чугас намыһах баттааһыннаах гаас лииньийэтэ 150-тан тахса миэтэрэ тэйиччи ааһар эбит. Президент Владимир Путин көҕүлээһининэн гаас сокуонугар киллэриллибит уларытыыларга эрэлэ улахан. Нэһилиэк баһылыга киниэхэ быһаарбытынан, испииһэккэ сылдьар, тех-былаана баар. Эһиил үбүлэниитэ быһаарылыннаҕына уонна сокуон өссө чопчуланнаҕына, холбонуу барыан сөп.


Светлана Спиридоновна идэтинэн агроном уонна асчыт дастабырыанньалаах. Алтыс кылааска үөрэнэр уонна нэһилиэк “Лена” оҕо саадыгар сылдьар кыргыттардаах. Саас ылбыт сибиинньэтэ уонна биэс кууруссата өссө бааллар. Кууруссалара күҥҥэ икки хас сымыыты сымыыттаан биэрэллэр. Сайынын оҕурсу, кабачок, хаппыыста, биэрэс, моркуоп, сүбүөкүлэ, хортуоппуй үүннэрэн кыһыҥҥы иҥэмтэлээх аһын хааччына сатаабыт.
Быйыл “араас тэрээһиннэргэ, бастатан туран, олох уустук балаһыанньатыгар түбэспит” кыаммат араҥаҕа бэриллэр көмөҕө улуустааҕы социальнай көмүскэл управлениетын кытта социальнай хантараак түһэрсэн, 55 тыһ солк ылбыт. Онон ас-үөл, таҥас-сап, оҕолоругар орон, матараас, таҥас угар хомуот атыыласпыт. Эһиил гаас ситимигэр холбонорун эрэнэ кэтэһэр.

Майаттан Аркадий Иннокентьев, «Саха сирэ», edersaas.ru сайтка анаан.

 

0
0
Telegram @edersaas20