Бэлиитикэ Сүрүн

Социальнай көмө харчы кирэдьиит иэһигэр сотуллуо суоҕа

Судаарыстыбаттан кэлэр социальнай көмөнү аны бааннар кирэдьиит иэһигэр ылыахтара суоҕа. Бу боппуруоһу РФ бэрэсидьиэнэ Владимир Путин “Биир ньыгыл Арассыыйа” баартыйа съеһин кэмигэр туруорда.

Социальнай анал көмө харчыны баан картатыттан быһа устан ылыы РФ бэрэсидьиэнин ыйааҕынан хааччахтанан турар. Ол эрээри итини бааннар тумна көтөллөр. Бааннар анал бырагыраамаларынан иэстээх киһи каартатыгар туох эмэ харчы түстэ да тутатына устан ылаллар. Онон уустук балаһыанньаҕа түбэспит киһи көмө харчытытыттан ытыс соттон хаалар. Быйыл ордук халаан уутугар, ойуур баһаарыгар эмсэҕэлээбит дьон итиннэ оҕустардылар. Ол иһин Владимир Путин этэринэн, манна туспа сокуон ылыныллыан наада.

“Тутатына этэбин, бу маннык дьаһаныы сыыһа. Социальнай аатыгар да этиллэринии, көмө быһыытынан кэлэр харчы. Оҕолортон, көмөҕө наадыйар дьонтон ону быһа тутан ылар диэн сыыһа. Онон манна кытаанах хонтуруол наада”, – диэн иһитиннэрдэ кини.

Аграфена КУЗЬМИНА,edersaas.ru

0
0