Маны аах Уопсастыба

Социальнай хантараагынан элбэх оҕолоох ийэ бэйэ дьыалатын тэриннэ

Социальнай хантараагынан элбэх оҕолоох ийэ бэйэ дьыалатын тэриннэ.

Намҥа элбэх оҕолоох ийэ Людмила Уваровская идэтинэн өр кэмҥэ үлэ булбатаҕа. Ол эрээри, кини судаарыстыбаннай социальнай көмөнөн, социальнай хантараакка олоҕуран «Art Dekor» устуудьуйаны арыйда.
Людмила Уваровская Намнааҕы педагогическай кэллиэһи, М.К.Аммосов аатынан ХИФУ үөрэнэн бүтэрбит. Учуутал идэлээх. Өр кэмҥэ үлэ көрдөөн баран булбатах.
«Төһө да кыһаллыбытым иһин, үлэ булбатаҕым. Онон быстах кэмҥэ солбуйан үлэлээбитим. Балаһыанньаны, хата, сөбүлүүр дьарыгым көннөрдө. Иллэҥ бириэмэ көһүннэр эрэ мин араас киэргэллэри оҥорорбун, иистэнэрбин сөбүлүүбүн. Оҕобун көрөн уоппускаҕа олорор кэммэр, миэхэ дьон полимернай туойтан кыра сувенирдары үлэһэн оҥоттороллор этэ. Дьиэ кэргэммин онон хааччыйар этим«, — диир Людмила Уваровская.
Кини социальнай ситимнэртэн көрөн өрөспүүбүлүкэҕэ маннык өйөбүл баарын, социальнай хантараакка олоҕуран көмө оҥоһулларын билбит. Бары ирдэбиллэргэ сөп түбэһэрин чопчулаан билэн баран, Людмила Уваровская нэһилиэк дьаһалтатыгар тиийбит.
«Бэйэ дьыалатын тэринэр туһунан толкуйга киирбитим ыраатта. Исписэлиистэри кытта кэпсэтэн баран, докумуоннарбын хомуйсубутум, биисинэс-бырайыак бэлэмнээбитим уонна сайаапкаламмытым», — диэн кэпсиир. Бырайыагын ситиһиилээхтик көмүскээн «Art Dekor» устуудьуйаны арыйар чиэскэ тиксибит. Кини онно уус-уран оҥоһуктары чочуйан таһаарарга маастар-кылаастары тэрийэн ыытар.
Социальнай хантараагынан ылбыт харчытынан урбаанньыт үлэтигэр-хамнаһыгар туттар тэриллэрин атыыласпыт.
«Урбаанньыкка саамай сүрүнэ, үлэтин саҕалыырыгар харчы. Социальнай хантараак көмөтүнэн, мин устуудьуйабын толору хааччыйдым. Аны билигин араас тиэмэҕэ маастар-кылаастары ыытарбар, үлэҕи хото ылыаҕым. Баҕа санаам туолла, сөбүлүүр дьарыгым аны биисинэскэ кубулуйда. Дохуот киллэрэр уонна дуоһуйууну аҕалар үлэ диэн улахан үөрүү. Бэйэ дьыалатын тэриниэн баҕалаах дьоҥҥо сыалгытын ситиһэр, баҕа санааҕытын толорор туһуттан куттаммакка иннигит диэки дьулуһуҥ диэн сүбэлиибин«, — диэтэ Людмила Уваровская.
0
0