Мэҥэ Хаҥаласка социальнай хантараагынан бэйэ дьыалатын тэринэн, араас хайысхаларга өҥөнү балачча ситиһиилээхтик оҥороллор.
Хантараагы улуустааҕы социальнай көмүскэл тэрилтэтин кытары түһэрсэллэр. СӨ Үлэ уонна социальнай сайдыы миниистирин солбуйааччы Альбина Трубина үлэтинэн Мэҥэ Хаҥаласка тахса сылдьан, социальнай хантараагынан бэйэ дьыалатын тэринэн үлэлии сылдьар дьону көрүстэ.
Майа сэлиэнньэтин олохтооҕо, элбэх оҕолоох аҕа Ян Семенов детейлинг-студия (автосервис) аһан үлэлэтэр. Ян Павлович 203 тыһ.солк. ылан маннык тэриммит. Кэлэр өртүгэр үлэтин кэҥэтэр, сайннарар былааннаах. Манна сакааһы социальнай ситиминэн оҥороллор.
Урбаанньыт Татьяна Винокурова кондитерскайдаммыт. Торт арааһа манна астанар. Судаарыстыбаттан ылбыт көмөтө 193 тыһ. солкуобай. Билигин төрөөбүт күннээхтэртэн, уруу тэрийээччилэртэн, малааһыннааччылартан, о.д.а. тэрээһиннэринэн үлэх күн ахсын киирэр диэн этэр.
Майа олохтооҕо, урбаанньыт Захар Федоров урут «Мегинострой» кэпэрэтиипкэ үлэлээбит. Ылбыт харчытын тимиртэн иһэрдэн, таптайан оҥорор үлэтигэр туһаммыт (@timirohuor). Захар Дмитриевич билигин тоҕус үлэһиттээх. Үлэҕи дьонтон, тэрилтэлэртэн социальнай ситиминэн ылаллар. Майаҕа кыһыҥҥы фонтаны, Комсомол болуоссатыгар киирэргэ сибэккилэрдээх, кыһыҥҥы кэмҥэ уотунан-күөһүнэн сандаарар улахан аарканы, искибиэргэ usb-гарнитуралаах ыскамыайкалары, тимир ааны, бөх кутар анал иһиттэри, сибэкки арааһын олордорго анал иһиттэри, о.д.а. оҥорбуттара болҕомтону тардар.
Урбаанньыт Альбина Павлова Майаҕа кэрэ буолуу салоннаах. Баттах кырыйаллар, кырааскалыыллар, кыламан уһаталлар, маникюр оҥороллор. Билигин салонугар үс маастардаах. Өссө парикмахер маастарыстыбатыгар үөрэтэллэр. Альбина Андреевна аҕам саастаахтар күннэригэр, интэринээт оҕолоругар, инбэлиит оҕолоох дьиэ кэргэттэргэ аахсыйалары оҥорор.
Петровка сэлиэнньэтин олохтооҕо, элбэх оҕолоох ийэ Сардаана Назарова минньигэс аһы-үөлү, торт арааһын астыырга ылсыбыт. Үлэтин сыыыйа сайыннаран алта асчыттаах. Бэкээринэтигэр анаан дьиэ арендалаабыт. Майаҕа уонна Аллараа Бэстээххэ фирменнэй маҕаһыыннардаммыт. Оттон сибиэһэй бурдук астарын дьон-сэргэ олохтоох маҕаһыыннартан үөрэ-көтө атыылаһар.
Майаҕа дизайнер Рада Федорова ательета болҕомтону тардар. Мастарыскыайга үлэҕинэн таҥас-сап арааһын тигэн биэрэллэр. Манна биирдиилээн дьону сэргэ, кэлэктиип эмиэ үлэҕинэн тиктэрэр.
Бырайыак кыттыылаахтара социальнай хантараак олохторугар уларытыылары киллэрэллэригэр көмөлөспүтүн, ыйдааҕы дохуоттара үрдээбитин бэлиэтииллэр.
Альбина Трубина улуус баһылыгын социальнай боппуруостарга солбуйааччы Мирон Свинобоевы кытары бу хайысханан үлэҕэ туох кыһалҕалар баалларын дьүүллэстэ, сэминээргэ кытынна.
