2022 сылга социальнай суолталаах эйгэлэргэ (социальнай бэлиитикэҕэ, доруобуйа харыстабылыгар, үөрэҕириигэ, култуураҕа, спорка) өрөспүүбүлүкэ бүддьүөтүгэр 1332,9 миллиард солкуобай көрүлүннэ, ол уопсай бүддьүөт 49,7%-на буолар.
Ол курдук, доруобуйа харыстабылыгар 23,7 миллиард солкуобай көрүллүбүт (былырыын 22,9 миллиард солкуобай этэ). “Доруобуйа харыстабыла” национальнай бырайыак чэрчитинэн, 6 эрэгийиэннээҕи бырайыак үлэлиир. Бу сыалга 2024 сылга диэри 17,9 миллиард солкуобай көрүллүбүт (ол иһигэр 2022 сылга – 6,05 миллиард солкуобай).
—— Доруобуйа харыстабылыгар үбүлээһин үрдээһинэ мэдиссиинэ тэрилтэлэрэ материальнай-техническэй базалара бөҕөргүүрүгэр, мэдиссиинэ көмөтүн хаачыстыбата үрдүүрүн, табыгастаах буоларын хааччыйыаҕа, — диэн Айсен Николаев эттэ.
“Сүрэх-тымыр ыарыыларын утары охсуһуу” бырайыагы үбүлээһин 35% улаатта. 2022 сылга 139 мөлүйүөн солкуобай көрүлүннэ (2021 сылга 103 мөл.солк. этэ).
“Искэн ыарыылары утары охсуһуу” бырайыак үбүлээһинэ 9% үрдээтэ – 5,27 миллиард солкуобай (былырыын 4,78 млрд. солк. этэ).
Национальнай бырайыактар чэрчилэринэн, 2022 сылтан 2,3 миллиард солкуобай үбүлээһинннээх “Модернизация первичного звена здравоохранения” федеральнай бырайыак баар буолуо. Үбүлээһинин улахан аҥаара – федеральнай бүддьүөттэн (2,19 млрд. солк.).
Эминэн хааччыйыыга уонна үрдүк технологиялаах көмөнү оҥорууга эрэгийиэннээҕи бүддьүөттэн 2022 сылга 2,9 миллиард солкуобай көрүлүннэ.
Саха сирин бүддьүөтэ сэтинньи 30 күнүгэр ылыллыбыта. Өрөспүүбүлүкэ дохуота 264,5 миллиард солкуобайга тэҥнэстэ. Бу хаһан да буола илик муҥутуур көрдөрүү буолар.
Ангелина Васильева, “Саха сирэ” хаһыат, edersaas.ru