Бүгүн, муус устар 20 күнүгэр, СӨ Бырабыыталыстыбатын бэрэссэдээтэлэ Андрей Тарасенко министиэристибэлэр уонна биэдимистибэлэр салайааччылара, норуот дьокутааттара кыттыылаах мунньаҕы ыытта.
Мунньахха бу сылларга маҥнайгы уочаратынан быһаарыллар сорудахтары ырыттылар. Онно үөрэх, доруобуйа харыстабыла, култуура уонна успуорт социальнай эбийиэктэрэ киирдилэр.
Мунньах кыттыылаахтара бырайыактааһын, тутуу уонна эбийиэк туттарыллар болдьохторун дьүүллэстилэр. Национальнай бырайыак бырагырааматын чэрчитинэн тутуллар эбийиэктэр маҥнайгы уочаратынан тутуллуохтара.
Андрей Тарасенко дойду үрдүнэн төһө да экэнэмиичэскэй кыһалҕалар, мэһэйдэр үөскээтэллэр, эрэгийиэн бырабыытылыстыбата социальнай эбийиэктэри тутууга бары күүһү ууруоҕа диэн бэлиэтээтэ. Бу эбийиэктэртэн улуустар олохторун хаачыстыбата быһаччы тутулуктааҕын эттэ.
—Хас биирдии эбийиэк тутулларыгар харчыны тыырыыга дойду таһымыгар улахан куонкурус буолуоҕа. Онон, хас биирдии салаа эбийиэктэр тутуллар уочараттарын үчүгэйдик наардааҥ, — диэн Андрей Тарасенко сорудахтаата.
Уочараты туруорууга араас төрүөттэр оруолу оонньууллар. Бырайыак харчытыттан, докумуонуттан саҕалаан, идиэйэтигэр, эрэгийиэн сайдыытыгар оруоллааҕын дуу, суоҕун дуу тиийэ көрүөхтэрэ. Бу критерийдэринэн учуоттанан, эбийиэктэр түмүктүүр баалы ылаллар.
СӨ Экэниэмикэтин министиэристибэтэ иһитиннэрбитинэн, реестргэ 299 эбийиэк киирбит. Олортон 207 эбийиэк үөрэх салаата, 47 доруобуйа харыстабыла, 15 социальнай эбийиэктэр, 17 успуорт уонна 13 култуура эбийиэктэрэ.
Мунньах түмүгүнэн, Андрей Тарасенко министиэристибэлэр уонна биэдэмистибэлэр салайааччыларыгар социальнай эбийиэктэр тутуллуохтаах уочараттарын испииһэктээҥ диэн сорудаҕы биэрдэ. Бу испииһэктэн Экэниэмикэ министиэристибэтэ үлэ уопсай былаанын оҥоруоҕа. Бу боппуруоска уочараттаах мунньах муус устар ый бүтүүтүгэр ыытыллыаҕа.
СӨ Ил Дарханын уонна Бырабыытылыстыбатын пресс-сулууспата
Хаартыска sakha.gov.ru