Ил Дархан Айсен Николаев быһа эпииргэ социальнай эбийиэктэри тутуу туһунан кэпсээтэ.
Тутуу салаата төһө да пандемия содулуттан эмсэҕэлээтэр, өрөспүүбүлүкэҕэ тыын суолталаах социальнай эбийиэктэр болдьохторун ааспакка, тутулла тураллар. Үгэс курдук, улахан тутуу тэрилтэлэрэ Арменияттан, Киргизияттан, Таджикистантан үлэһиттэри аҕалан үлэлэтэллэрэ. Быйыл үлэһиттэри аҕалыы уустуктардаах буолла. Ол эрээри, олохтоох дьону үлэлэтии бу кыһалҕаны туораппата.
— Бырабыыталыстыбаҕа, үөрэх министиэристибэтигэр, дьарыктаах буолуу кэмитиэтигэр тутуу салаатын идэлэригэр исписэлиистэри бэлэмнииллэригэр сорук туруордум. Оччоҕо эрэ атын дойдулартан үлэһиттэр кэлэн дьиэлэрбитин тутан биэрэллэрин кэтэспэккэ, тутааччыларга наадыйыыны сабыахпыт. Ол эрээри, билиҥҥитэ, тутуу кыраапыгар хаалыы суох, болдьоҕу тутуһан иһэбит, — диэн Айсен Сергеевич эттэ.
Ол курдук, онкодиспансер, кардиодиспансер, оскуолалар, оҕо саадтара, култуура дьиэлэрэ, Аллараа Бэстээххэ бассейннаах спортивнай комплекс болдьохторуттан хаалбакка, тутулла тураллар.
Ангелина Васильева, “Саха сирэ” хаһыат, edersaas.ru
Хаартыска: интэриниэттэн