Бүтэһик күннэргэ социальнай тэрилтэлэргэ сүүсчэ киһи ыарыйда
Бүгүн, атырдьах ыйын 13 күнүгэр, 12:00 чааска Саха сирин Ил Дархана Айсен Николаев эрэгийиэҥҥэ коронавирус балаһыанньатын туһунан брифинг ыытта.
Ил Дархан Айсен Николаев:
— Буола турар быһыы-майгы тыҥааһыннаах. Бүтэһик күннэргэ ыарыы элбээбитин бэлиэтиибит. Ааспыт сууккаҕа 62 киһи коронавирус дьаҥыгар эбии сутулунна. Онтон 39 киһи Дьокуускайга, 10 киһи Хаҥалас улууһугар уонна Нерюнгрига, Мииринэйгэ, Алдаҥҥа биирдии киһи ыарыйда.
Хаҥаласка бу күннэргэ олус элбэх киһи ыарыйда. Бу Мохсоҕоллооҕу психоневрологическай диспансеры кытта сибээстээх. Хомойуох иһин, ааспыт күннэргэ үс социальнай тэрилтэҕэ (онтон иккитэ Дьокуускайга уонна биир Мохсоҕоллооххо) 100-чэ киһи коронавирустаабыта бэлиэтэннэ. Бу СӨ Үлэҕэ министиэристибэтэ Томмоттооҕу диспансерга (манна 50-чэ киһи ыалдьыбыта, өлүү да баар этэ) буолбут түбэлтэттэн сөптөөх уруоктары ылымматаҕын түмүгэр буолла. Онон мин бырабыыталыстыбаҕа, Ил Дархан уонна бырабыыталыстыба дьаһалтатыгар Үлэ министиэристибэтин салалтатын тус эппиэтинэһин туһунан сорудахтаатым.
Дьокуускайга төһө да ыарыы аччаабытын иһин холкутуйарга эрдэ. Билигин дьон уоппускаттан төннөр, оҕолор үөрэххэ кэлэр кэмнэрэ буолла. Ыарыы оскуолаларга, уһуйааннарга, орто, үрдүк үөрэх кыһаларыгар тарҕаныа суохтаах. Балаҕан ыйын 1 күнүттэн саҕаланар үөрэх кэмигэр туох баар миэрэлэри тутуһар туһунан ыйаахха илии баттыаҕым.
edersaas.ru