Айсен Николаев социальнай тэрилтэлэр үлэһиттэригэр эбии төлөбүр туһунан ыйаахха илии баттаата
Пандемия кэмигэр миэдиктэр эрэ буолбакка, социальнай тэрилтэлэр үлэһиттэрэ эмиэ үлэ үөһүгэр түбэстилэр. Кинилэр инбэлииттэргэ, аҕам саастаах дьоҥҥо көмөлөһөллөр.
Хантаактаспат уонна тэрилтэлэргэ дьаҥ туруутун тумнар туһуттан персонал туспа эрэсиимнээх үлэлиир. Ол курдук, үлэһиттэр 14 күн устата тэрилтэ иһиттэн тахсыбакка түбүгүрэ сылдьаллар.
Арассыыйа Бэрэсидьиэнэ Владимир Путин бу эйгэ үлэһиттэригэр эбии төлөбүр туһунан этии киллэрбитэ.
Ыам ыйын 21 күнүгэр Ил Дархан Айсен Николаев Саха сирин социальнай тэрилтэлэрин үлэһиттэригэр эбии төлөбүр көрүллэрин туһунан ыйаахха илии баттаата.
Бүгүҥҥү күҥҥэ СӨ суһал штабын быһаарыытынан өрөспүүбүлүкэбитигэр 38 тэрилтэ хааччахтааһын эрэсиимигэр киирбитэ, манна үс тыһыынча киһи олорор уонна 800 киһи үлэлиир.
Докумуоҥҥа сурулларынан, социальнай тэрилтэлэр быраастара икки нэдиэлэ үлэлээтэхтэринэ 40 тыһыынча солкуобай көрүллэр. Оттон коронавирус дьаҥнаах ыарыһах баар буоллаҕына, төлөбүр 60 тыһынча солкуобайга тэҥнэһэр.
Орто, социальнай уонна педагогическай үлэһиттэргэ, психологтарга, салалтаҕа — 25 тыһыынча солкуобай, коронавирус дьаҥнаах ыарыһахтары кытта үлэлиир буоллахтарына 35 тыһыынча солкуобай көрүллэр.
Алын персоналга — 15 уонна 20 тыһыынча солкуобай, тиэхиньиичэскэй персоналга — 10 уонна 15 тыһыынча солкуобай көрүллэр.
Ыйааҕы сиһилии манна ааҕыҥ: glava.sakha.gov.ru
Ил Дархан уонна бырабыыталыстыба пресс-сулууспата.