Быйыл куораппыт киин уулуссаларыгар өрөмүөн үлэтэ тигинэччи барар. Онуоха оптуобустар сылдьар маршруттара уларыйан, дьоҥҥо-сэргэҕэ уонна оптуобус суоппардарыгар табыгаһа суоҕа кистэл буолбатах. Ол да буоллар, үлэ хаһан эрэ түмүктэнэн, куораппыт уулуссалара хаһааҥҥытааҕар да тупсуохтара, сырыы-айан сыыдамсыйар кэмэ кэлиэ.
edersaas.ru
Билигин Киров-Октябрьскай, Дзержинскэй-Курашов, Дзержинскэй-Кулаковскай, Дзержинскэй-Курашов, Хабаров-Краснояров уулуссалар учаастактарыгар өрөмүөн үлэлэрэ бара тураллар.
Ленин проспегын өрөмүөннээһин — «Куттала суох хаачыстыбалаах суоллар» национальнай бырайыагы олоххо киллэрии чэрчитинэн, Дьокуускайга ыытыллар саамай улахан бырайыак.
Ленин болуоссатыгар өрөмүөн үлэтэ күн аайы икки симиэнэнэн барар.
Бүгүн «Главстрой» МКУ дириэктэрэ Алексей Варламов суруналыыстарга Ленин болуоссатын өрөмүөннээһин бырайыагынан суолу оҥоруу уонна уу сүүрэр систиэмэтин уларытыы үлэтин туһунан кэпсииригэр: «Собуокка оҥоһуллубут, дойду улахан куораттарыгар туттуллар уу сүүрэр аныгы холлоҕостор туһаныллыахтара. Холлоҕостор кытаанах полимербетонтан оҥоһуллубуттар. Матырыйаала тымныыны тулуйарынан уонна бөҕөтүнэн уратылаах. Уу сүүрэр холлоҕосторун 1 килэмиэтир уһуҥҥа диэри оҥоруу от ыйыгар былааннанар», -– диэтэ.
Ленин болуоссатын олохтоохтук өрөмүөннүүргэ 2020 с. ГОСТ ирдэбилинэн оҥоһуллубут аспаал булкааһа ууруллуоҕа. Былаан быһыытынан, атырдьах ыйыгар Ленин уулуссатыттан Дзержинскэй уулуссатыгар диэри уонна Кулаковскай уулуссалара аспаалланыахтара.
Олохтоох өрөмүөн бырайыагын быһыытынан, тас сырдатыы кабелларын уонна оптики утаҕын лииньийэлэрин ситимнэрэ сиргэ пай-турбаҕа ууруллуохтара.
Сатыы киһи сылдьар сиригэр эмиэ улахан болҕомто ууруллуоҕа. Ленин уулуссатын кыйа киһи сылдьар тротуардара гранитнай (көнө муннуктаах) уонна вибропрессованнай таастан оҥоһуллуохтара. Ону таһынан сатыы киһи сылдьар сирэ бэлэсипиэккэ аналлаах 2 миэтэрэ кэтиттээх зоналаах буолуоҕа.
Оптуобус тохтобулларын 11 павильона, ол иһигэр 3 сылаас тохтобул, уларытыллыаҕа. Сылаас павильоннар «Киин», «Лена» киинэ тыйаатырдарын таһынааҕы тохтобулга уонна Доҕордоһуу болуоссатыгар баар буолуохтара.
Ленин проспегар 500-чэ, ол иһигэр яблоня, сирень, акация мастары олордуохтара.
Бу нэдиэлэ бүтүүтэ — аныгыскы нэдиэлэ саҕаланыыта үргүлдьү ааһар суол Ленин уонна Октябрьскай уулуссалар быһа охсуһууларыгар аһыллыаҕа. Онтон Курашов-Аммосов уонна Кулаковскай уулуссалар быһа охсуһууларыгар эмиэ үргүлдьү ааһар сырыы саҕаланыа.
Надежда ЕГОРОВА, «Саха сирэ», edersaas.ru