Сотору Нам кырдьаҕастара уонна инбэлииттэрэ саҥа таас дьиэлэниэхтэрэ (ВИДЕО)

Бу күннэргэ Нам сэлиэнньэтигэр кырдьаҕастар уонна инбэлииттэр таас дьиэлэрэ тутуута тэтимнээхтик ыытылла турар. 

Эбийиэк сүрүн бэдэрээччитэ «Капитал» АЭБ. Былырыын балаҕан ыйыгар Ил Дархан Айсен Николаев Нам улууһугар сырыытын кэмигэр Намнааҕы кырдьаҕастар уонна инбэлииттэр дьиэлэригэр сылдьан, үөрүүлээх быһыыга-майгыга  саҥа дьиэ бастакы сыбаайатын түһэриигэ кыттыбыта. Кини бу 65  миэстэлээх таас дьиэ «Демография» национальнай бырайыак чэрчитинэн ыытылларын бэлиэтээбитэ.

Бу күннэргэ Үлэ уонна социальнай сайдыы миниистирэ Елена Волкова кырдьаҕастар  интэринээттэригэр сылдьан, үлэни-хамнаһы кытта билистэ.

— Федеральнай көмөнү ылар инниттэн министиэристибэ үлэһиттэрэ улахан тэрээһин үлэни ыыппыппыт. Онуоха улуус дьаһалтата бырайыактыыр-сметалыыр докумуону кэмигэр оҥоро  охсон, үлэ биллэ тэтимирбитэ. Ол түмүгэр 2021-2023 сылларга РФ Үлэҕэ министиэристибэтэ «Демография» национальнай бырайыак чэрчитинэн Намҥа өрөспүүбүлүкэ кырдьаҕастарыгар уонна инбэлииттэригэр саҥа таас дьиэ тутуллар буолбута. Эрэгийиэннээҕи «Саастаах көлүөнэ» бырайыак чэрчитинэн үгүс үлэ ыытыллар. Биллэн турар, бу саҥа тутуу өрөспүүбүлүкэ социальнай сайдыытын кэрэһилиир биир хаачыстыбалаах сүрүн тутуу буолара чахчы, — диэн бэлиэтээтэ миниистир Елена Волкова.

Нам улууһун баһылыгын социальнай боппуруостарга солбуйааччы Мария Игнатьева иһитиннэрбитинэн, сэлиэнньэ киин пааркатын аттынааҕы сир-уот доруобуйа уонна култуурунай сынньалаҥ зонатынан буолуоҕа.  Оттон билигин үлэлии турар интэринээт дьиэтэ сокуоннай саастарын туола илик оҕолор приюттарынан буолуоҕа.
Кырдьаҕастар уонна инбэлииттэр дьиэлэрин дириэктэрэ Анастасия Заболоцкая бэлиэтииринэн, икки мэндиэмэннээх мас дьиэ 1994 сыллаахха тутуллан киирбит.

— Манна билигин 25 киһи олорор. Кинилэри 24 анал үлэһит көрөр-истэр, харайар. 28 сыл устата ДИПИ оҥорор социальнай өҥөтүнэн 400 кырдьаҕас дьон туһанна. 

Өрөспүүбүлүкэ салалтата, министиэристибэбит туруорсан, кырдьаҕастар саҥа дьиэлэнэллэрин эрэнэ кэтэһэллэр, — диэн Анастасия Ивановна санаатын үллэһиннэ.

Миниистир Елена Волкова Намнааҕы кырдьаҕастар уонна инбэлииттэр олорор дьиэлэрин көрөн-истэн баран, социальнай үлэһиттэр бары ирдэбиллэрин тутуһан, үлэлэрин хаачыстыбалаахтык толороллорун бэлиэтээтэ.

Елена ПОТОЦКАЯ, «Саха сирэ» хаһыат.

Ааптар хаартыскаҕа түһэриитэ уонна видеоҕа устуута.