Сотору Дьокуускайга Сүрэх-тымыр киинэ аһыллыаҕа

Бөлөххө киир:

Былааннаммытын курдук, муус устар бүтэһигэр Дьокуускайга сүрэх-тымыр киинэ аһыллыаҕа. Саҥа эмтиир мэдиссиинискэй тэрилтэ кыаҕа аныгы килииникэ саамай үрдүк ирдэбиллэригэр эппиэттиир.

Cүрэх-тымыр киинин өҥөтүнэн өрөспүүбүлүкэ ыраах сытар улуустарын олохтоохторуттан саҕалаан, куорат олохтоохторугар тиийэ туһаныахтара.
Саҥа киин  Өрөспүүбүлүкэтээҕи 1 №-дээх балыыһа-Мэдиссиинэ Национальнай киинин структурнай подразделениетынан буолуоҕа. Кииҥҥэ кардиология, нейрососудистай, неврология уонна сүрэх сорох ыарыыларын отделениелара баар буолуохтара. Эбийиэк 150 уопсай уонна 25 реанимация куойкалардаах.
Киин үлэҕэ киирдэҕинэ кэккэ соруктар тураллар:
— 2024 сылга диэри нэһилиэнньэ олоҕун уһуна 78 сааска тиийиэхтээх;
— 2024 сылга диэри өрөспүүбүлүкэҕэ хаан эргиирин систиэмэтин ыарыыларыттан өлүү 100 тыһыынча нэһилиэнньэҕэ 364-тэн 279 диэри аҕыйыахтаах, ол иһигэр үлэлиир кыахтаах нэһилиэнньэҕэ -– 100 тыһыынча нэһилиэнньэҕэ 140-гэ диэри.
Сүрэх-тымыр киинин Мэдиссиинэ национальнай киинин кытары сылаас туоруур сир ситимниир. Ону таһынан кислород ыстаансыйалаах, 50 куб.м убаҕас оттукка ыскылааттаах, дизель уот ыстаансыйалаах, ыраастыыр тэриллээх уонна аккумулирующай резервуардаах. Дьиэ уопсай иэнэ — 15 463,1 м2,  8 этээстээх, 150 куойка-миэстэлээх.
Киин мэдиссиинэ кыаҕын киэҥник туһанарга көмөлөһөр аныгы тэриллэрдээх. Холобур, Philips Azurion 7 M20 ангиографическай систиэмэ, Siemens SOMATOM Force көмпүүтэр томограба, Philips Ingenia Ambition X аппараат уо.д.а. Саҥа технологиялар көмөлөрүнэн миокардиты, чопчута суох аритмиялары уонна кардиологияҕа атын да уустук боппуруостары чопчу быһаарар кыах бэриллиэҕэ. Ону таһынан, биллэн турар, мэдиссиинискэй өҥө хаачыстыбата тупсуоҕа, ыарыыны эрдэтээҥи түһүмэххэ быһаарар кыах баар буолуоҕа. Онон, Саха сирин олохтоохторо өрөспүүбүлүкэ таһыгар барбакка эрэ, миэстэтигэр хаачыстыбалаахтык эмтэнэр буолуохтара.
Сүрэх-тымыр киинэ үрдүк таһымнаах быраастардаах, орто мэдиссиинискэй сүһүөх үлэһиттэрдээх. ЭКаадырдары бэлэмнээһин өссө тутуу ыытыллыан инниттэн саҕаламмыта.

Өрөспүүбүлүкэ 100 сылын көрсө аанын арыйыахтаах Сүрэх-тымыр киинин тутуу «Уһук Илин уонна Забайкалье» федеральнай бырагырааманан СӨ экэниэмикэ үрдээһинин кииннэрин социальнай сайдыыларын  былаанын дьаһалларын чэрчитинэн ыытылынна.

Надежда ЕГОРОВА, «Саха сирэ», edersaas.ru

+1
0
+1
0
+1
0
+1
0
+1
0
+1
0
+1
0