Ааһан эрэр сыл ахсынньы 25 күнүгэр Бүлүү улууһун Сосновка сэлиэнньэтигэр саҥа эмтиир тэрилтэ – биэлсэр-акушер пууна аһылынна.
edersaas.ru
300-чэкэ нэһилиэнньэлээх сэлиэнньэҕэ мэдиссиинэ үрдүк таһымнаах көмөтө, аныгы тэриллэр, ыарыһахтары көрөргө табыгастаах усулуобуйа баар буолла. Олохтоохтор бу үөрүүлээх түгэни күүппүттэрэ ыраатта.
Кинилэри П.А.Петров аатынан улуустааҕы Киин балыыһа кылаабынай бырааһа Егор Григорьев: «Аныгы технологиялар көмөлөрүнэн биэлсэр-акушер пуунун аҕыйах ый иһигэр туттубут. Урут маннык дьиэлэри тутарга биир сыл наада буолара. Кылаабынайа, олохтоохтор медицинскэй көмөнү дьиэҕититтэн ырааппакка эрэ, миэстэтигэр ылар буолуоххут”, — диэн эҕэрдэ тылын эттэ.
Кылаабынай быраас эппитинэн, сотору кэминэн Сосновка сэлиэнньэтигэр исписэлиис-быраастардаах, көһө сылдьар флюорографтаах биригээдэлэр кэлэллэрэ былааннанар.
Саҥа биэлсэр-акушер пууна аһыллан, билигин тыа сирин дьонугар быраас кэлиэр диэри бастакы көмө оҥоһуллуоҕа, оҕо күүтэр дьахталлар доруобуйаларын бэйэлэригэр кэтээн көрүөхтэрэ.
Саҥа ылыллыбыт аныгы эмтиир тэриллэр ыарыыны сөптөөхтүк быһаарарга, улахан дьону уонна оҕолору диспансеризациянан хааччыйарга, ыарыыны эрдэттэн буларга уонна бастакы суһал көмөнү оҥорорго көмөлөөх буолуохтара.
Надежда ЕГОРОВА, “Саха сирэ”, edersaas.ru