Сорох университеттар орто үөрэх кэнниттэн туттарсааччылартан биир кэлим эксээмэни ирдииллэр
Быйыл орто анал үөрэх кэнниттэн үрдүк үөрэххэ туттарсааччыларга сыһыаннаах уларыйыылар киирдилэр. Ол курдук, урукку өттүгэр тиэхиньикуму, кэллиэһи бүтэрбиттэртэн биир кэлим эксээмэн ирдэммэт этэ. Быйылгыттан хайдах (биир кэлим эксээмэнинэн дуу, университет бэйэтин эксээмэнинэн дуу) үөрэххэ ыларын үрдүк үөрэх тэрилтэлэрэ бэйэлэрэ быһаарар буоллулар.
Холобур, Санкт-Петербурдааҕы судаарыстыбаннай университет уонна И.М. Сеченов аатынан мэдиссиинэ Москватааҕы судаарыстыбаннай университета орто анал үөрэх кэнниттэн туттарсааччылары биир кэлим эксээмэнинэн (ЕГЭ) эрэ ыларын туһунан быраабылатыгар ыйбыт. Оттон ХИФУ-га хайдаҕый?
“Тиэхиньикуму, кэллиэһи бүтэрбиттэр үөрэххэ туттарсар исписээлинэстэригэр сөп түбэһэр хайысхалаах үөрэххэ киирэр түгэннэригэр университет бэйэтэ ыытар тургутууларын ааһаллар. Ханнык хайысхатын университет бэйэтэ быһаарар. Холобур, “эмчит дьыалата” диэҥҥэ биһиги “сиэстэрэ дьыалатын” исписээлинэһин ылбыппыт. Уонна онно сөптөөх физиология, анатомия эксээмэнин туттараллар. Ханнык исписээлинэстээхтэриттэн тутулуга суох, холобур, орто анал учуутал үөрэхтээх ыччат физиологияны, анатомияны бэйэтэ үөрэтэн билэр, университет бэйэтэ ыытар тургутууларынан киирэр кыахтаах буоллаҕына киириэн сөп. Билбэт түгэнигэр биир кэлим эксээмэни (ЕГЭ) туттарара ирдэнэр.
Эбэтэр сибээс тиэхиньикумун кэнниттэн ХИФУ Математика уонна информатика институтун программист идэтигэр туттарсааччылар, информатиканы уонна ИКТ-ны, үрдүкү математика элеменнэрин, нуучча тылын туттараллар”, — диэн ХИФУ киин тутар хамыыһыйатыгар быһаардылар.
Манна даҕатан эттэххэ, орто анал үөрэҕи бүтэрээччилэр, бүтэрбиттэр ханна туттарсалларыттан көрөн үрдүк үөрэхтэр саайтарын эрдэттэн үөрэтэллэрэ итиэннэ биир кэлим эксээмэн ирдэнэр түгэнигэр 2022 сыл тохсунньуну хойутаппакка сайабалыанньаларын биэрэллэрэ ирдэнэр. Тоҕо диэтэххэ, быйыл эксээмэн туттарар дьонтон сайабылыанньалары 2022 сыл олунньу 1 күнүгэр эрэ диэри ылаллар. Сайабылыанньаны ханна бэриллэри edersaas.ru саайт иһитиннэрэн турар. Сиһилии СӨ Үөрэҕин уонна наукатын министиэристибэтин саайтыгар көрүөххүтүн сөп.
Людмила ПОПОВА, “Саха сирэ” хаһыат, edersaas.ru
Хаартыска: hatstaste.jimdofree.com