Бэс ыйын 1 күнүттэн ньиэп бородууктатын сыаната, быһа холоон, 1 – 2 солкуобайынан үрдүөҕэ. Бу туһунан «Сахамедиа» медиа-киинигэр ыытыллыбыт пресс-конференцияҕа Нэһилиэнньэҕэ куттал суоһаабатын хааччыйар судаарыстыбаннай кэмитиэт бэрэссэдээтэлэ Юрий Зайцев иһитиннэрдэ.
Сыана соҕуруу сытар оройуоннарга үрдүөҕэ. Ол курдук, Нерюнгри, Алдан улуустарыгар тимир суол баар буолан, сыаналара уларыйа, халбаҥныы турар. Холобур, 95-тээх бензин билигин 41 солк. 40 харчыга тэҥнэһэр эбит буоллаҕына, бэс ыйын 1 күнүттэн 43 солк. буолуоҕа. Иккис зонаҕа уларыйыы тахсыбат. Оттон үһүс зонаҕа 95-тээх бензин 61 солк. 40 харчыга тэҥнэһиэҕэ (билигин манна биир лиитирэтэ 59 солк. 90 харчы).
Өрөспүүбүлүкэҕэ сыананы олохтооһун үс зонаҕа арахсар. Ол курдук, бастакы зонаҕа өрөспүүбүлүкэ соҕуруу сытар оройуоннара, ол иһигэр Нерюнгри, Алдан, иккискэ киин, Бүлүү бөлөх уонна Мирнэй, Ленскэй улуустара, оттон үһүскэ хоту улуустар киирэллэр. Тиэйии-таһыы ороскуота тус-туһунан буолан, Дьокуускайга уонна Өлөөҥҥө сыана биир тэҥник быһыллыбат.
«Саханефтегазсбыт» ААУо генеральнай дириэктэрин солбуйааччы Евгений Лемешевы кытары сибээскэ тахса сылдьыбыппытыгар, кэлэр ыйтан бастакы уонна үһүс зоналарга бензин сыаната 1-2 солкуобайынан үрдүөхтээҕин туһунан иһитиннэрдэ. Оттон иккис зонаҕа уларыйыы тахсыа суоҕа.