Бэйэни хааччахтаан дьиэҕэ олоруу эрэсиимэ биллэриллибит муниципальнай тэриллиилэр сорох тэрилтэлэрэ үлэлиир буоллулар.
Бу туһунан Ил Дархан Айсен Николаев бүгүҥҥү аһаҕас эпииргэ эттэ.
Ол курдук, өрөспүүбүлүкэ бары нэһилиэнньэлээх пуннара үс бөлөххө араарылыннылар. Бастакы бөлөххө эрдэттэн “самоизоляция” эрэсиимэ киирбит Дьокуускай, Нерюнгри, Мииринэй, Алдан, Ленскэй куораттара уонна Жатай, Аллараа Бэстээх, Тикси бөһүөлэктэрэ киирдилэр. Бу олохтоох тэриллиилэргэ эрдэ ылыныллыбыт хааччахтар оннунан хааллылар, ол гынан баран, кэккэ чэпчэтиилэр киирдилэр. Мэдиссиинискэй лиссиэнсийэлээх мэдиссиинэ тэрилтэлэрэ, туспа турар дьиэлээх-уоттаах бородуукта, сибээс маҕаһыыннара, массыына өрөмүөннүүр, сууйар тэрилтэлэр үлэлииллэрэ көҥүллэннэ. Бу тэрилтэлэр Роспотребнадзор ирдэбилин күүскэ тутуһаллара ирдэнэр.
Ирдэбили кэспит тэрилтэлэр ыстараап төлүүллэрин таһынан, сабыллыахтара диэн Айсен Николаев бэлиэтээн эттэ.
Ньургуйаана Иванова, “Саха сирэ” хаһыат, edersaas.ru
Хаартыска — интэриниэттэн.