Сорох муниципальнай тэриллиилэргэ сарсын өрөбүл күнүнэн биллэрилиннэ
Ил Дархан Айсен Николаев киэһэ 22 чаастан телевидениенэн, араадьыйанан уонна социальнай ситимнэринэн ойуур баһаардарынан сибээстээн брифинг ыытта.
«РФ бэрэсидьиэнэ Владимир Путин сорудаҕынан, өрөспүүбүлүкэҕэ ЫБМ миниистирэ Евгений Зиничев салайааччылаах улахан бөлөх кэллэ. Зиничев Горнай Бэс Күөлүгэр сылдьан, миэстэтигэр балаһыанньаны кытары билистэ. Сарсын Нам, Чурапчы, Уус Алдан, Горнай улуустарыгар уоту утары охсуһууга түүн ЫБММ исписэлиистэрэ кэлэллэрэ күүтүллэр. Амуртан Ми-8 уонна Ми-26 бөртөлүөт Хабаровскайтан өссө кэлиэхтэрэ. 63 баһаары умуруорууга үлэ ыытыллар. Нам, Горнай, Чурапчы, Уус Алдан, Кэбээйи улуустарыгар балаһыанньа кытаанах. Тиэхиньикэ алдьанар түгэнэ эмиэ баар. Федеральнай, өрөспүүбүлүкэтээҕи, олохтоох нэһилиэнньэ, доброволецтар көмөлөрүнэн аны аҕыйах күнүнэн балаһыанньа этэҥҥэ буолуо. Дьокуускайга буруо туһунан этэр буоллахха, сымыйа сураҕы тарҕатар буоллулар. Баһаар куоракка чугаһаата диэн. Буруо хойдон, дьон-сэргэ дьиэлэригэр олордуннар диэн, бүгүн анал ыйаахха илии баттаатым. Ол курдук, сарсын, атырдьах ыйын 13 күнэ, өрөбүл күнүнэн сорох муниципальнай тэриллиилэргэ биллэриллэр, ол иһигэр Дьокуускай куоракка, Жатай уокуругар, Бүлүүгэ, Горнайга, Кэбээйигэ, Мэҥэ Хаҥаласка, Намҥа, Тааттаҕа,Уус Алдаҥҥа, Хаҥаласка, Чурапчыга, — диэн брифинг кэмигэр иһитиннэрдэ.
edersaas.ru