Урукку өттүгэр куорат олохтоохторо өрөбүл күннэргэ кууһунан атыылыыр маҕаһыыннары кэрийэр эбит буоллахтарына, билигин үлэ күнүгэр кытта сылдьар буоллулар. Санкциянан сылтаан ас-үөл кырыымчык буолуо диэн социальнай ситимнэринэн араас сураҕы тарҕатаннар, дьон-сэргэ бородууктаны хото хаһаанан эрэр.
Иллэрээ күн уонна бэҕэһээ кууһунан атыылыыр маҕаһыннарга сылдьан, сыана төһө үрдээбитин көрдүм. Дьон бары Чернышевскай уулуссаҕа баар базаларга сылдьаллар. Онон ол диэки барбакка, Жорницкай уулуссаҕа баар «Геоком» атыы-эргиэн киинигэр сырыттым.
Дьокуускай куорат олохтоохторун таһынан, улуустан кэлбит дьон элбэх. Үгүстэрэ үүнээйи арыытын, бурдугу, саахары, рис куруппаны, мокоруону кууһунан атыылаһаллар. Сыана араастаһар. Холобур, биир маҕаһыыҥҥа «Санни-голд» арыы 170, аттынааҕы маҕаһыыҥҥа 190 солкуобайга атыыланар. Биир маҕаһыын атыыһыта: «Үс эрэ хоппо «Санни-голд» арыы хаалла. Дьон бу күннэргэ үүнээйи арыытын олус элбэҕи атыыластылар», — диэн кэпсээтэ.
Үрдүк суортаах бурдук 5 киилэтэ 230, 10 киилэтэ — 460, 25 киилэтэ — 1100 солкуобайынан быһыллыбыт. Рис куруппа 10 киилэтэ 680 солкуобайга атыыланар.
Салгыы биирдиилээн аһы-үөлү атыылыыр маҕаһыыннарга сырыттым. Поярков уулуссаҕа баар «Скиф» маҕаһыыныгар сыананы көрдүм. Хата манна «Санни-голд» арыы сыаната быдан чэпчэки эбит.
Короленко уулуссаҕа баар Ykt market маҕаһыыҥҥа киирэ сырыттым. Бу манна сыаналара халбаҥныы турар эбит. Холобур, саахар сыаната каассаҕа тиийдэххэ олох даҕаны сыаната уларыйыан сөп эбит.
Үүнээйи арыытын сыаната дэписсиит буолуо диэн үгүс дьон сылыктыыр буолан, бу сырыыга анаан-минээн арыы эрэ сыанатын көрдүм.
edersaas.ru