Сыстыганнаах дьаҥынан сибээстээн, бары тэрээһин куйаар ситиминэн ыытыллар буолла.
edersaas.ru
Маныаха дьон социальнай ситимнэри хото туһанар буоллулар. Ол курдук, өрөспүүбүлүкэ улуустарыгар Ийэ күнүн бэрт интэриэһинэйдик тэрийэн ыыттылар. Холобура, Тымныы полюһа Өймөкөөн улууһун Сордоҥнооҕун аҕалара бырааһынньык күн батсаап ситимигэр нэһилиэк ийэлэригэр анал батсаап бөлөх тэрийбиттэр. Бу туһунан нэһилиэк дьокутаата Татьяна Готовцева маннык кэпсиир:
— Ийэлэр бөлөхтөрүгэр эр дьоммут бэйэлэрин махтал тылларын ырыанан доҕуһуоллаттылар.
Кэрэхсэбиллээҕэ баар ийэлэр Дьокуускайтан, Магадаантан тиийэ күндү дьонноруттан эҕэрдэ бастыҥын туттулар.
Онон, төһө да уустук кэм буоллар, бэйэ-бэйэбитин кытта көрсөр хааччах олохтоннор, эр дьоммут биһиэхэ, ийэлэргэ, болҕомто ууран олуһун долгуттулар.
Киһи киһиэхэ кыра да үөрүүнү бэлэхтиирэ ханнык да ыарахаҥҥа бэриммэт эбит. Онон бу курдук пандемия кэмигэр санаабытын түһэрбэккэ бэйэ-бэйэбитин өйөһө олорортон ордук суох.
Елена ПОТОЦКАЯ, «Саха сирэ» хаһыат, edersaas.ru