Сыл аайы үгэс быһыытынан, Өймөкөөн улууһун Сордоҥноох нэһилиэгэр хайысхаларынан араарыллан анал Спартакиада ыытыллар.
edersaas.ru
Урукку сылларга түөлбэлэринэн барар эбит буоллаҕына, тэрээһин кэлиҥҥи сылларга көлүөнэлэринэн ыытыллар. Инньэ гынан, бэйэлэрин саастыылаахтарын чиэстэрин түһэн биэрбэт инниттэн, кыра нэһилиэк олохтоохторо бары кэриэтэ кытталлар.
Саҥа дьыллааҕы тэрээһиннэргэ сөп түбэһиннэрэн, Култуура спартакиадатын чэрчитинэн «Латино-американскай» уонна «Вальс» үҥкүүлэр көрүҥнэригэр үс хамаанда куоталаста.
— Саастарынан арааран, 35-гэр диэри — иккилии «Латино-американскай» үҥкүүгэ, 35-тэн үөһээ — «Вальска» күрэстэстилэр. Урут-уруккуттан биһиги ыччаттарбыт үҥкүүнү өрө туталларын дьоро киэһэҕэ өссө төгүл бигэргэттилэр. Бииртэн биир түргэн уонна абылаҥнаах үҥкүүнү киһи эрэ астына, дуоһуйа көрө олоруон курдук!
Оттон орто уонна аҕа саастаах дьон нарын муусука доҕуһуолунан вальстаан эргичийбиттэрэ, көрүөхтэн кэрэ көстүү буолла.
Саамай хайҕаллааҕа, хаһааҥҥытааҕар да элбэх күүстээх аҥардарбыт маҥан «сорочкаларын» кэтэн, «бабочкаларын» иилинэн, систэрин көннөрөн, көп-көнөтүк дьоһуннук туттан үҥкүүлээбиттэрэ көрүөххэ олус үчүгэйэ.
Ордук, «Чысхаан» уонна «Биир сомоҕо» хамаандалар вальстара көрөөччүлэр куттарын туттулар. Күрэс түмүгүнэн: 1 миэстэ -«Чысхаан», 2 миэстэ -«Биир сомоҕо», 3 миэстэ «Ситим» хамаандалар буоллулар.
Мантан ураты үс номинация иҥэрилиннэ: «Чысхаан» хамаандаттан «Бастыҥ үҥкүүһүт»- Елена Борисова, «Биир сомоҕо» хамаандаттан «Грация-2019» номинация куруук ыытыллар мероприятиелары көтүппэккэ, иккиэн бииргэ кыттар кэргэннии Мария, Михаил Заболоцкайдарга тигистэ. «Бастыҥ үҥкүү бөлөҕө» номинацияны «Чысхаан» хамаанда вальса ылыан ылла.
Абылаҥнаах үҥкүү киэһэтин бэлэхтээбит, таҥастарын-саптарын тиксибит уран тарбахтаах дьоммутугар көрөөччүлэр ааттарыттан барҕа махталбытын тиэрдэбит.
Куруутун бу курдук түмсүүлээх, актыыбынай буолан, өрүү холобурга сылдьыҥ. Биһиги бу дьоммутунан киэн туттабыт, — диэн «Хотугу сардаҥа» хаһыат уопсастыбаннай кэрэспэдьиэннэрэ Варвара Иванова уонна Ирина Цыренова сахалыы тыллаах хаһыат батсаап бөлөҕөр анаан сырдаттылар.
Сордоҥноох олохтоохторо көхтөөхтөрүнэн, сомоҕолоһуулаахтарынан улууска биир тарбахха баттанар бастыҥ нэһилиэк буолар. Дьиэлэриттэн-уоттарыттан, үлэлэриттэн-хамнастарыттан быыс булан, бэйэ-бэйэлэрин көҕүлээн, өйөөн, аҕыйах кэм иһигэр бэлэмнэнэ охсон, 60-ча киһи Култуура спатакиадатын чэрчитинэн бэртээхэй үҥкүү дьоро киэһэтин бэлэхтээтилэр.
Сомоҕолоһуу сыла — сордоҥноохтор сыллара. Онон маннык көхтөөх, сомоҕолоһуулаах нэһилиэк быйыл өссө тугу тэрийэн улуус олохтоохторун соһутара уонна сөхтөрөрө биллибэт. Кинилэртэн биир дойдулаахтара бэрт дьоһуннааҕы уонна үйэлээҕи эрэнэ кэтэһэллэр.
Елена ПОТОЦКАЯ, «Саха сирэ» хаһыат edersaas.ru
Хаартыска — Варвара Иванова түһэриитэ.