Өймөкөөн улууһун Сордоҥноох нэһилиэгин дьаһалтатын көҕүлээһининэн сыл аайы нэһилиэги тупсарыыга олохтоохтор бырайыак толкуйдаан көмүскүүллэр.
edersaas.ru
Бу туһунан нэһилиэк бэрэстэбиитэллээх уорганын дьокутаата Татьяна Готовцева маннык кэпсиир:
— 2016 сыллаахха дьаһалта баһылыга Иван Максимов нэһилиэги тупсарыыга бэрт сэргэх куонкуруһу саҕалаабыта. Ол төрүөтэ — нэһилиэк салалтата тустаах докумуону оҥорон, СӨ ОДьКХ министиэристибэтин 1,5 мөл. солк. гранын сүүйүүтэ этэ. Кэрэхсэбиллээҕэ баар, бырайыак куонкуруһугар өрүү оскуола оҕолоро актыыбынай кыттыыны ылаллар. Ол сыл 4-c кылаас үөрэнээччилэрэ бассейн оҥорорго этии киллэрбиттэрэ. Баһылыкпыт бу этиини олус сэргээбитэ. Бастаан утаа дьокутааттар истэрбитигэр остуоруйаҕа тэҥнээх курдуга: Тымныы полюһугар — бассейн! Онтон нэһилиэкпит салалтата урбаанньыт Иван Заболоцкайы кытта кэпсэтэн, 2017 сыллаахха бассейыммыт үлэҕэ киирбитэ.
Дьэ, онтон ыла үс сылы быһа сайын аайы куйаас күннэргэ оҕолуун, улахан дьоннуун нэһилиэкпит бассейыныттан тахсыбаппыт.
Нэдиэлэҕэ биирдэ — чэппиэр аайы бассейн уута уларытыллар. Быһа холуйан, уу баһар массыынабыт 20-тэ кырынан Индигиир уутун таһар.
Бүгүн сайыҥҥы куйаас күн буолан, нэһилиэкпит ортотугар турар бассейн эмиэ оҕо-аймах дьоллоох күлүүтүнэн туолла.
Тымныы полюһун Өймөкөөн улууһун Сордоҥноох нэһилиэгин салалтата «Өксөкүлээхтии олоруохха!» диэн тус быраагырааманан үлэлээбитэ бэһис сылыгар барда. Бу тосхол чэрчитинэн нэһилиэккэ бэрт элбэх сонун тутуу барда, араас интэриэһинэй тэрээһин ыытыллар.
Елена ПОТОЦКАЯ, «Cаха сирэ» хаһыат, edersaas.ru
Хаартыска — Татьяна Готовцева түһэриитэ.