Сыстыганнаах дьаҥ туһунан араас иһитиннэриилэри ааҕа-билсэ олорбуппут ахсыс ыйа буолла.
edersaas.ru
Онтон эрэ, биллэн турар, коронавирус пандемията хаһан түмүктэнэрин туһунан иһитиннэрии ордук интэриэһиргэтэр. Ол эрээри дьаҥ пандемията өтөрүнэн бүтүө суох курдук. Соторутааҕыта РИА «Новости» агенствоҕа Роспотребнадзор Эпидемиологияҕа научнай-чинчийэр интститутун клинико-аналитическай үлэҕэ дириэктэри солбуйааччы Наталья Пшеничная COVID-19 инфекцията өссө да балтараа сыл барыаҕын туһунан сабаҕалаһынын эттэ.
Эспиэр этэринэн, араас дойдуга сотору-сотору «итии туочукалар» күөдьүйэн тахсыахтара. Бу иннинэ институт научнай үлэҕэ дириэктэри солбуйааччы Александр Горелов дойдуга коронавирус инфекцията ахсынньы бастакы дэкээдэтигэр намырыаҕа диэн иһитиннэрбитэ.
Арассыыйаҕа ааспыт сууккаҕа дойду 85 эригийэнигэр сыстыгыннаах дьаҥынан сутуллуу 17 347 түбэлтэтэ бэлиэтэннэ. Бу — кэлиҥҥи кэмҥэ саамай улахан көрдөрүү. Ордук элбэх киһи— Москваҕа (5224), Санкт-Петербурга (715) уонна Москва уобалаһыгар (499) ыарыйда.
Елена ПОТОЦКАЯ, «Cаха сирэ» хаһыат, edersaas.ru
Хаартыска — РИА «Новости»