Амма улууһун Соморсун нэһилиэгэр Улуу Кыайыы 75 сылыгар Бастакы Чакыртан “Маяк” уонна “Киров” холкуостан уоттаах сэриигэ баран сырдык тыыннарын толук уурбут буойуннарыгар анаммыт өйдөбүнньүк монумены туруордулар.
edersaas.ru, «Амма олоҕо» хаһыат
Амма улууһун бары нэһилиэктэригэр Улуу Кыайыы 75 сылыгар анаммыт араас тэрээһиннэр тиһигин быспакка ыытыллаллар. Онтон биирдэстэринэн өйдөбүнньүк бэлиэлэри туруоруу буолар. Соморсун нэһилиэгэр Бастакы Чакыр сиригэр-уотугар тигинээн үлэлии олорбут “Маяк” уонна “Киров” холкуос дьонугар анаммыт “Мин мантан сэриигэ барбытым” диэн ааттаах өйдөбүнньүк монумены арыйдылар.“Тэрээһин буоларыгар сүрүн хайысхатын салайбыт, киллэрбит Саха өрөспүүбүлүкэтин тыатын хаһаайыстыбатын үтүөлээх үлэһитэ, СӨ тыатын хаһаайыстыбатын бэтэрээнэ, “Гражданскай килбиэн” бэлиэ хаһаайына, ытыктабыллаах Мария Ефимовна Федороваҕа, Дьокуускай куоракка Соморсун нэһилиэгин түмсүүтүн салайааччыта, тэрээһин сүрүн тэрийээччитигэр Егор Христанович Герасимовка, монумент тутуллуутун тэрийсибит, спонсор быһыытынан үлэлэспит Спиридон Спиридонович Старостиҥҥа, спонсордар Станислав Семенович Терентьевка, Петр Петровичка Кармановка, монумент комплексын тутуу үлэтин ыыппыт Каракановтар, Григорьевтар ыччатыгар, Хоптоҕо, Чакыр нэһилиэктэрин, “Киров”, “Маяк” холхуос бары олохтоохторугар, харчынан кыттыспыт Бастакы Чакыртан төрүттээх бар дьоммутугар, спонсордарбытыгар барҕа махтал тылларын тириэрдэбит!” – диэн кэпсээтэ Соморсун нэһилиэгин баһылыга Алексей Кононов.
Бу үөрүүлээх бэлиэ күҥҥэ күндү ыалдьыттарынан тэрээһини сүрүннээбит, монумент туруоруутугар күүс-көмө буолбут Егор Герасимов, Спиридон Старостин, СӨ норуодунай суруйааччыта Баһылай Харысхал уо.д.а. буолан эҕэрдэ тылларын тириэртилэр, үлэ хайдах барбытын билиһиннэрдилэр. Бу күн кэлбит дьон ааспыты ахтыһан, билиҥҥини сэһэргэһэн, үйэлээҕи үйэтитэр чахчы да дьоһун тэрээһин буолбутун бэлиэтээн аастылар.
“Амма олоҕо” хаһыат
+1
+1
+1
+1
+1
+1
+1