Коронавирус дьаҥын бохсорго ханна да үлэһит норуот, биэнсийэлээхтэр, урбаанньыттар, эдэр ыччат, улуустар, нэһилиэктэр дьаһалталара күүс-кыах тиийэринэн көмөлөһөллөр.
Коронавирус дьаҥын бохсорго улуустар турунан үлэлэһэллэр. Тааттаҕа таҥаһынан элбэхтэ кэтиллэр мааскалары улуус нэһилиэктэрин бары оскуолалара, оҕо уһуйааннара, тэрилтэлэр турунан тигэннэр, кыһалҕалаах боппуруос кэбэҕэстик быһаарылларыгар төһүү күүһүнэн буолбуттара. Бэйэ дьоно тикпит мааскаларын балыыһа үлэһиттэригэр, дьиэлэригэр хааччахтанан олорор кырдьаҕастарга, элбэх оҕолоох ыалларга сонно түҥэппиттэрэ. Оттон эппиэттээх үлэҕэ сылдьар волонтердарга анаан, Ытык Күөл олохтоохторо М.С.Беркина, С.В.Власова тигэн биэртэлээбиттэрэ. Урбаанньыттар Василий Кашкин «Сервис-континент» IT-континент ХЭУо уонна Василий Данилов Москваттан, Дьокуускайтан Николай Акимов дьонноругар-сэргэлэригэр өйөбүл буолан, мааскалары ыытаннар дойдулаахтарын улаханнык үөрдүбүттэрэ. Кинилэр ыыппыт мааскалара обсерватор үлэһиттэригэр, полиция сотрудниктарыгар түҥэтиллибиттэрэ.
Улуустааҕы киин балыыһаҕа «Төлөн» Харбалаахтааҕы чох разреһын кэлэктиибэ (генеральнай дириэктэр Прокопий Рахлеев), Таатта улууһун дьаһалтата, Татта нэһилиэгэ, Тыараһа дьаһалтата уонна дьоно-сэргэтэ, Октябрьскай нэһилиэк, «Тааттаавтодор» ААУо, урбаанньыттар: В.В.Андросов («Байдам» маҕаһыын), С.Н.Андросов («Баай Ас» маҕаһыын), Т.И.Ноенохова («Татьяна» маҕаһыын), «Мебельнэй» — 5, «Рассвет» маҕаһыыннар көмөлөспүттэрэ.