А.Е.Кулаковскай аатынан норуоттар доҕордоһууларын дьиэтин ресурснай үөрэтэр-методологическай киинин сүрүннүүр методиһа Айна Павлова өрөспүүбүлүкэтээҕи ресурснай киин эбии үөрэхтээһиҥҥэ педагога Валентина Николаева ыҥырыытынан, быраабы үөрэтэр лааҕырга «Юные якутяне» диэн куруһуок оҕолоругар анаан Норуоттар сомоҕолоһууларын күнүн көрсө уруок ыытта. Бу туһунан норуоттар доҕордоһууларын дьиэтин пресс-сулууспата иһитиннэрэр.
— Уруокка оҕолор «Патриоты», «Правозащитники», «Паспорт» хамаандаларга арахсан күрэхтэспиттэр. Уруок сыала-соруга — төрөөбүт дойдуга, тулалыыр эйгэҕэ тапталы иҥэрии, бэриниилээх буолууга, сиэр-майгы, билии-көрүү өртүнэн үрдүк таһымнаах буолууга, бэйэ-бэйэҕэ эйэҕэс, ытыктабыллаах сыһыаны олохтооһуҥҥа, быраабы билиигэ уонна үрдүк култууралаах буолууга сирдээһин. Бу барыта судаарыстыба сайдыытыгар хамсаабат бигэ, сүрүн тирэҕинэн буоларын өйдөтүү. Маны сэргэ, оҕолор атын дойдулар бырааһынньыктарын туһунан истэн билиилэрин-көрүүлэрин хаҥаппыттар. «Норуоттар сомоҕолоһууларын күнэ хас биирдиибитигэр дойдубут устуоруйатын үйэлээх үгэстэрин кэрэһилиир бэлиэ күнүнэн буолар» диэн санааларын үллэстибиттэр.
Норуот сомоҕолоһуутун күнэ сыллата киэҥ далааһыннанан иһэр. Арассыыйа куораттарыгар улахан тэрээһиннэр, кэнсиэртэр, спортивнай күрэхтэһиилэр, норуот күүлэйэ өрө көтөҕүллүүлээхтик тэриллэн ыытыллаллар. Бу күн барыбыт сүрэхпитигэр ураты, сылаас тыынынан илгийэр. Бука барыгытын А.Е.Кулаковскай аатынан норуоттар доҕордоһууларын дьиэтин кэлэктиибин аатыттан кэлэн иһэр долгуйа күүтэр күммүтүнэн — Норуоттар сомоҕолоһууларын күнүнэн итиитик-истиҥник эҕэрдэлиибит.