«Нам улууһа» МТ салалтата бэрт кэскиллээх дьыалаҕа ылсыбыт холобура — улуус социальнай сайдыытыгар туһуламмыт пуонданы тэрийии.
edersaas.ru
Бу сонун хайысхалаах үлэлээх тэрилтэни Андрей Бочкарев салайар.
— Бастакы улахан тэрээһиммит — Олоҥхо Ыһыаҕа. Онтон Нам чулуу уолаттара Максим Аммосов, Илья Винокуров үбүлүөйдэрэ кэлиэҕэ. Онон пуонда үлэтэ далааһыннаах хайысхалаах – спонсордары кытта ыкса үлэлэһэн, бүддьүөт таһыттан үп киириитин тобулуу, — диэн кэпсэтиибитин саҕалыыр Андрей Виссарионович.
Бүгүҥҥү күҥҥэ Олоҥхо Ыһыаҕын өйүүр соруктаах бүддьүөтү таһынан пуондаҕа 13 мөлүйүөн солк. киирдэ. 7 мөлүйүөн солк. кэриҥэ олохтоохтор икки күннээх хамнастарыттан киирбит.
— Ону тэҥэ генеральнай спонсор “АЯМТрансСервис“ ХЭУо тимир суол логистическай киинэ (сал. Н.В. Азаров), Нам улууһуттан төрүттээх “Якутоптторг”, “Сахабулт”, “Копиртехсерис” курдук тэрилтэлэр салайааччылара “официальнай спонсор” диэн статуһу ылан, дьоһуннаах үп-харчы киллэрдилэр. Онон бизнесмен уолаттарбыт төрөөбүт дойдуларын дойдуларын туһугар бэйэлэрин кылааттарын киллэрэн, Олоҥхо Ыһыаҕын тутуулара тэтимнээхтик барыыларыгар күүс-көмө, өйөбүл оҥордулар.
1984 сыллаахха оскуоланы бүтэрбит оҕолор 35 сыллаах үбүлүөйдэринэн сибээстээн, улуус нэһилиэктэригэр Олоҥхо Ыһыаҕар ким туох кыахтааҕынан харчынан кыттыһарыгар ыҥырыы таһаарбыттара. Инньэ гынан 107 тыһ.солк. мунньан, пуондаҕа туттардылар. Үбүлүөйдээх выпускниктар ыҥырыыларын атыттар эмиэ өйөөн, улуус орто оскуолаларын араас кэмнэргэ бүтэрбит дьонтон көмө харчы билигин да киирэ турар. Онон Ыһыах үбүлээһинин пуондата норуот өйөбүлүнэн хаҥыы турар. Бу үп этнографическай тиһик эбийиэктэрин тутууга туттуллар.
Култуура эйгэтигэр сылдьар ыччаттарбыт 3 тыһыынчаттан тахса көрөөччүлээх стадиоҥҥа кэнсиэр бэлэмнээн, ол тэрээһинтэн киирбит харчыны эмиэ пуондаҕа угаары сылдьаллар.
Оттон бу күннэргэ биир дойдулаахтарбыт, “Колми” ХЭУо салайааччылара Наталья Леонидовна уонна Николай Иннокентьевич Румянцевтар 2019 с. оҥоһуллан тахсыбыт, 880 тыһ. солк. суумалаах УАЗ ПАТРИОТ саҥа массыынаны Олоҥхо Ыһыаҕын кыайыылаах бочуоттаах олоҥхоһутугар сүрүн бириис быһыытынан туруордулар. Ат сүүрдүүтүгэр эмиэ биир улахан бириис — массыына баар буолуоҕа.
Бу күннэргэ «Барҕарыы пуонда көҕүлээһининэн «РусГидро» ПАО (сал. Н.Г. Шульгинов) 5 мөлүйүөн солкуобай биэрэрин туһунан сөбүлэһиигэ пуонда илии баттаста. Биһиэхэ өрөспүүбүлүкэ салалтата олус улахан өйөбүлү оҥорор.
Сомоҕолоһуу сылынан улуустар өйөбүллэрэ
Сомоҕолоһуу сылынан сибээстээн, Үөһээ Бүлүү Үөдүгэйиттэн аҕа саастаах дьон түмсүүлэрэ кэлэн, кэнсиэр туруорбуттара. Кинилэртэн саамай аҕа саастаахтара 86 саастаах этэ. Ол тэрээһин үбүн-харчытын эмиэ уопсай пуондаҕа киллэрбиттэрэ. Култуура идэлээх сойуустарын ыччата эмиэ гастроллаан бардылар. Горнай, Хаҥалас улуустарыттан кэлэн, улууспут дьонун сэргэхситтилэр. Бэйэбит улууспут нэһилиэктэриттэн эмиэ уус-уран кэнсиэрдээх, дьаарбаҥка быыстапкалаах, лотереялаах кэлэн, пуондабытыгар тустаах кылааттарын киллэрдилэр. Онон дьон-сэргэ санаата кэлэн, өйөбүл сүҥкэн. Итинник аахсыйалар бу хаалбыт кэм устата эмиэ ыытыллыахтара диэн эрэнэ күүтэбит.
Елена ПОТОЦКАЯ, «Саха сирэ» хаһыат, edersaas.ru
Хаартыскаҕа ааптар түһэриитэ.