Сэтинньи 3-4 күннэригэр Өксөкүлээх Өлөксөй аатынан норуоттар доҕордоһууларын дьиэтэ үгэс буолбут «Норуоттар култууралара — норуоттар сомоҕолоһуулара» диэн IV пуоруму тэрийэн ыытыаҕа.
edersaas.ru
Улуу Кыайыы 75 сылыгар норуоттар сомоҕолоһууларыгар анаммыт тэрээһин коронавирус сыстыганнаах дьаҥынан сибээстээн, онлайн-эрэсииминэн ыытыллыаҕа. Ийэ дойдуга бэриниилээх буолуу сылыгар ыччаты патриотизмҥа иитии, норуоттар доҕордоһууларын, бэйэ-бэйэлэрин өйдөһүүлэрин, өйөһүүлэрин бөҕөргөтүү боппуруоһа сытыытык турар кэмигэр бу пуорум олус суолталаах . Тэрээһини СӨ Тас сибээскэ министиэристибэтэ, Өксөкүлээх Өлөксөй аатынан норуоттар доҕордоһууларын дьиэтэ уонна Саха сирин норуоттарын Ассамблеята тэрийдилэр. Пуорумҥа өрөспүүбүлүкэ муниципальнай тэриллиилэрин уонна куораттар уокуруктарын бэрэстэбиитэллэрэ, уопсастыбаннай тэрилтэлэр кыттыыны ылыахтара.
Икки күн устата ыытыллар тэрээһин быраагыраамата киэҥ: 1941-1945 сылларга Аҕа дойду сэриитин кэмигэр Сэбиэскэй Сойуус норуоттара Улуу Кыайыыны уһансыбыт кылааттарын уонна устуоруйаны аныгы кэмҥэ үөрэтии туһунан кэтэхтэн научнай-практическай кэмпириэнсийэ, «Норуоттар сомоҕолоһуулара — Арассыыйа күүһэ» онлайн-кэнсиэр, кэккэ боппуруоска сэминээрдэр ыытыллыахтара.
Елена ПОТОЦКАЯ, «Саха сирэ» хаһыат, edersaas.ru