Сомоҕолоһуу дьаарбаҥкатыгар күн талбыта тардылынна

Бөлөххө киир:

«Сахамедиа» уонна «Сахабэчээт» идэлээх түмсүүлэрэ кыттыһан, Сомоҕолоһуу сылын түмүктүүргэ бүгүн, ахсынньы 9 күнүгэр, дьаарбаҥка тэрийдилэр. Манна бэчээт үлэһиттэрэ илиилэрин сылааһын иҥэрэн, тарбахтарын талаанынан бэйэлэрэ оҥорбут Саҥа дьыллааҕы оҥоһуктарын, хартыыналарын, киэргэллэрин, астарын аҕалан атыылаатылар.


Моонньоҕон, отон барыанньата, боҕуруоскай от, күөх луук, балыктан кэтилиэт, Эһээ Дьыл сүбэһит түөрэҕэ, дьиэни-уоту, киһи чараас эйгэтин ыраастыыр тымтыга, илин-кэлин кэбиһэр, бэйэ тикпит бэргэһэтэ, үтүлүгэ уо.д.а. атыыга таҕыстылар.

Екатерина Бястинова:

—Саҥа Дьыл тыынын билэ таарыйа бүгүн биир идэлээхтэрбит оҥоһуктарын киэҥ эйгэҕэ таһаардынар уонна кыра дохуот киллэрдинэр диэн муһуннубут. Мин дьүөгэлэрим оҥорбут дьэрэкээн ойуулаах сыттыктарын, бэс эриэхэлэриттэн хомуллубут венок, 2020 сыл бэлиэлэрин уонна хонуу луугун, моонньоҕон барыанньатын, дьиэ салгынын ыраастыыр боҕуруоскай оту аҕаллым, — диэтэ.

Анна Захарова филтинг ньыматынан үтүлүк оҥорбут, ийэтэ оҕуруонан таҥара мэтириэтин тыыннаах курдук тиһэн таһаарбыт. Зоя Угарова аҕа кутун уһугуннарар, эр киһи сүрүн көтөҕөр, дьиэ кэргэнин иитэригэр үчүгэй үлэлээх-хамнастаах  буоларыгар көмөлөһөр түөрт кут ымыытын көрдөрдө. «Ону таһынан, олоххор туох эрэ быһаарыныы ылынаргар, ону-маны ыйытаргар   кэннигэр түөрэх быраҕан, сүбэлэһэҕин. Үстэ бырахпыккар хамыйах иккитэ көмүстээх өртүнэн түстэҕинэ, ол дьыалаҕын ылсаргар тоҕоостоох кэм, умса түстэҕинэ сөбө суох”, — диэн быһаарар кини.

Хас биирдии киһи Саҥа Дьылтан туох эрэ дьиктини, алыптааҕы, кэрэни күүтэр. 2020 сылга санаабыккыт сатанан, толкуйдаабыккыт табыллан, баҕарбыккыт баар буолан истин!

Марианна Тыртыкова, «Саха сирэ» хаһыат, edersaas.ru

 

+1
0
+1
0
+1
0
+1
0
+1
0
+1
0
+1
0