Бу чааска премьер Владимир Солодов өрөспүүбүлүкэтээҕи техническэй хайысхалаах Василий Никифоров-Күлүмнүүр аатынан Дүпсүннээҕи оҕо технопааркатын көрдө.
Бу тэрилтэ 2018 сыл алтынньытыттан аһыллан үлэлиир. Маны сэргэ, манна кыраайы үөрэтэр музей уонна аатырбыт Космонавтика музейа бааллара болҕомтону улаханнык тардаллар. Манна, эбии үөрэхтээһин тэрилтэтигэр, сүүһүнэн оҕо үөрэ-көтө дьарыктанар. Оҕолорго идэлээх исписэлиистэр онуо буолан сэттэ араас куруһуогу иилээн-саҕалаан олус интэриэһинэйдик, сэргэхтик тэрийэн ыыталлар.
Премьер Владимир Солодов авиамоделирование куруһуогун анаан-минээн киирэн көрдө, билистэ. Манна 15 оҕо дьарыктанар. Сүрүннээн обургу оҕолор сылдьан дьарыктаналларын олус сөбүлээтэ, хайҕаата. Оттон робототехника куруһуогар исписэлиис тиийбэт эбит. Информатика, робототехника уонна математика учуутала Максим Пахомов кыһалҕаны быһаарар туһуттан, араспысаанньа быһыытынан нэдиэлэҕэ иккитэ Кэптэниттэн кэлэн оҕолору дьарыктыырын кэпсиир. «Чааһы кыайбатынан айанныыр буолан кэм ама, мэһэйдэппэппин. Эбиэттэн киэһээ кэлэн үлэлиибин. Уонча оҕону дьарыктыыбын. Бэйэм Чурапчы Улахан Күөлэбин», — диир Максим Семенович.
Владимир Солодов оҕо технопааркатын үлэтин көрөн-истэн, дьон-сэргэ санаатын истэн баран, үрдүк сыанабылы биэрдэ.
Елена ПОТОЦКАЯ, «Саха сирэ» хаһыат, edersaas.ru