Быйылгы уратылаах Улуу Кыайыы күнүн Горнай улууһун Солоҕонугар үгэскэ кубулуйбут «Аттыбытыгар бэтэрээн олорор» аахсыйаны сонуннук ыыттылар.
edersaas.ru
Бу сонун хайысхалаах тэрээһин туһунан Солоҕоннооҕу Култуура киинин исписэлииһэ Андрей Сивцев сырдатар:
— Cыл аайы “Дьэргэлгэн” оҕо тэрилтэтэ (сал. Алексеева С.К.) бэтэрээннэри дьиэлэригэр тиийэн эҕэрдэлиир эбит буоллаҕына, быйыл дьиэҕэ олоруу эрэсииминэн сибээстээн, Өрт орто оскуолатын иһинэн үлэлиир түмсүү кыттыылаахтара дьиэҕэ олорор аҕам саастаахтарга Улуу Кыайыы 75 сылынан Эҕэрдэ сурук суруйдулар.
Ол суруктары суруйууга дьон кэтэхтэн (дистанционно) кыттан, “Почта России” Солоҕоннооҕу салаатыгар тиэрпиттэр.
Бу суруктары почта үлэһиттэрэ дьоҥҥо тиэргэннэринэн тиэрдибиттэр. Онон кытаанах санитарнай ирдэбил тутуһуллан, ытык кырдьаҕастар хас биирдиилэрэ истиҥ иһирэх эҕэрдэлэри тутан, үөрүүлэрэ муҥура суох.
Үтүө үгэһи тутуһан, Өрт нэһилиэгин урбаанньыттара бэйэлэрин маҕаһыыннарыттан тыыл бэтэрээнэригэр, сэрии тулаайахтарыгар, сэрии кэмин оҕолоругар кэһии-бэлэх оҥордулар.
Эмиэ санитарнай эрэсиими тутуһан, бэлэхтэрин кырдьаҕастарбытыгар тиэртилэр.
Онон бу күн Солоҕон кырдьаҕастара дьиэлэрин аттыттан бэлэх арааһын туттулар.
Ыам ыйын 9 күнүгэр сарсыардаттан “Өлбөт үйэлээх полк”, “Уруйдан, Улуу Кыайыы!” кэнсиэр ZOOM бырагырааманан быһа эпииргэ уонна социальнай ситимнэринэн нэһилиэк уус-уран самодеятельноһын кыттыылаахтара, талааннаах дьиэ-кэргэттэр, Солоҕонтон төрүттээх бар дьоммут, улууспут олохтоохторо эҕэрдэ нүөмэрдэрин ыыта олордулар.
Өрт орто оскуолата Кыайыы 75 сылын көрсө ыыппыт тэрээһиннэрин түмүгүн таһаарда.
Михаил Дьячковскай аатынан түөлбэ уулуссатын киэргэтиигэ күрэх ыытылынна.
Манна олохтоохтор дьиэ кэргэттэринэн бары бэрт көхтөөх кыттыыны ыллылар.
Ыал аайы түннүктэрин киэргэппиттэрэ, олус үчүгэй көстүү буолла.
Тиэргэн аайы ыалларынан бэйэлэрин бэтэрээннэрин хаартыскаларын ыйаатылар.
Дьон батсаап ситимигэр: “Дьиэҕэ олоруу эрэсиимэ биир үчүгэйи оҥордо — нэһилиэкпит урукку өттүгэр хаһан да киэргэммэтэҕин киэргэннэ. Түөлбэлэр олус бэрткэ түмүстүлэр”, – суруйан, дьон-сэргэ уопсай сыанабыла маннык буолла.
Ити курдук, 75 сылы быһа эйэлээх олох сырдык дьаралыгынан кынаттанан олорорбутугар Улуу Кыайыыга махтанан, Горнай улууһун солоҕотторо бырааһынньыгы олус уратытык айхаллаан бэлиэтээтилэр.
Елена ПОТОЦКАЯ, «Саха сирэ» хаһыат, edersaas.ru
Хаартыска — Андрей Сивцев тиксэриитэ.