2019 сыл тохсунньу 1 күнүттэн Арассыыйа Федерациятын Ойуур кодексын, итиэннэ «Саха Өрөспүүбүлүкэтигэр ойуурга сыһыаннаһыы эйгэтигэр кэккэ боломуочуйалары олоххо киллэрэр туһунан» өрөспүүбүлүкэтээҕи сокуоҥҥа сылбаҕы ойуур мас буолбатах ресурсатыгар киллэрэр туһунан көннөрүү күүһүгэр киирдэ.
edersaas.ru
Ойуур кодексын 4-с чааһын 33-с ыстатыйатыгар олоҕуран, бэйэ наадатыгар анаан ойуур мас буолбатах ресурсатын соҕотуопкалааһын уонна хомуйуу бэрээдэгэ Арассыыйа субъегын сокуонунан бигэргэнэр. Бу балаһыанньаҕа олоҕуран, «Саха Өрөспүүбүлүкэтигэр ойуурга сыһыаннаһыы эйгэтигэр кэккэ боломуочуйалары олоххо киллэрэр туһунан» сокуоҥҥа бэс ыйын 19 күнүгэр сылбаҕы ойуур мас буолбатах ресурсатыгар киллэрэр, итиэннэ бэйэ наадатыгар босхо туһанар туһунан көннөрүү киллэрилиннэ.
Онон, урукку өттүгэр сылбаҕы хомуйарга маһы кэрдэр туһунан дуогабары түһэрсэр ирдэнэр буоллаҕына, быйыл сайыҥҥыттан сылбаҕы ураты харыстанар территориялартан ураты сиргэ хаһан баҕарар уонна хааччаҕа суох хомуйан туттуохха сөп. Сокуоҥҥа киирбит көннөрүүгэ “сылбах” (валежник) диэн өйдөбүлгэ мас ханнык көрүҥэ киирэрин туһунан бэрт ырылхайдык чопчу ыйыллар. Ол курдук, сылбах диэн ойуурга сиргэ сууллан сытар мас сытыйбыт биитэр эмэҕирбит умнастара, мутуктара, лабаалара ааттанар. Манна тыал сөрөөн суулларбыт, хаар баттаан тоһуппут мастара эмиэ киирэллэр. Биир тылынан эттэххэ, тутууга туһаныллар кыаҕа суох, сиргэ сытар мас “сылбах” дэнэр. Оттон тыаны солуурга, маһы кэрдэргэ тахсыбыт мас тобоҕо-ибэҕэ сылбахха киирсибэт. Сылбаҕы хомуйууга Ойуур Кодексын, Баһаартан сэрэхтээх буолуу, Ойууру чөлүгэр түһэрии ирдэбиллэрэ хайаан да тутуһуллуохтаахтар. Гражданнар сылбаҕы хантан хомуйалларын олохтоох лестничестволартан ыйытыахтарын сөп.
Кураанах сылбаҕы хомуйар көдьүүһэ улахан. Бииринэн, баай хара тыа дөбөҥнүк умайар матырыйаалтан, итиэннэ ыарыыны тарҕатар эмэх мастартан ыраастанар. Иккиһинэн, кураанах сылбах оттук быһыытынан туттуллан, элбэх чэгиэн мас саһааҥҥа кэрдиллэрин быыһыыр.
Раиса Сибирякова, «Саха сирэ» хаһыат, edersaas.ru