От ыйын 1 күнүгэр Арассыыйа үрдүнэн дойду Төрүт сокуонугар көннөрүүлэри киллэриигэ куоластааһын ыытыллаары турар. Куоластааһыҥҥа үөһээ бүлүүлэр хайдах-туох санаалаах кыттыыны ылаары сылдьалларын туһунан кылгастык ыйыталастыбыт.
Нам нэһилиэгин бочуоттаах олохтооҕо, педагогическай үлэ бэтэрээнэ, нэһилиэк Сэбиэтин дьокутаата Люция Егорова:
– Мин кырдьаҕас быыбардааччы буоларым быһыытынан, Конституцияҕа уларытыылары киллэриини өйүүбүн уонна булгуччу куоластыыбын.
РФ суруналыыстарын Сойууһун чилиэнэ Надежда Тойтонова:
– Уларыйыыны сөбүлээбэт, куоластааһыҥҥа кыттыбаттарын аһаҕастык этинэр дьон бааллар. Хас биирдии киһи бэйэтэ тус санаатын тутуһара – ол кини бырааба. Быраап күөмчүлэниэ суохтаах. Ол эрэн, баҕабынан куоласка кыттан, тус санаабын биллэриэхтээхпин.
«Үөһээ Бүлүү сэлиэнньэтэ» МТ баһылыгын сүбэһитэ Георгий Степанов:
– Дойду Конституциятыгар уопсайа 206 уларытыы киирээри турар. Олортон ордук суолталаахтарынан экологияны харыстааһыҥҥа, историяны кырдьыктааҕынан көрдөрүүгэ, үрдүкү салайааччылар атын тас дойдуга гражданствота суох буолууларыгар, дьиэ кэргэн уруккутааҕар күүстээх харысхаллаах буолуутугар туһуламмыт көннөрүүлэр уо.д.а. социальнай хайысхалаах көннөрүүлэр буолаллар диэн ааҕабын. Мин бэйэм чааһым куоластааһыҥҥа кыттыыны ылабын.
Конституцияҕа көннөрүүлэри киллэриигэ куоластааһыны сүрүн тэрээһин быһыытынан өйбүтүнэн-санаабытынан ылынан, бу историческэй түгэҥҥэ кыттарбыт быһаарар суолталаах.
Бэлэмнээтилэр Галина СЕМЕНОВА, Валентина ДОГОЮСОВА.
ulus.media саайтан.