Анаабырга Үрүҥ Хайатааҕы агротехнологическай хайысхалаах орто оскуолаҕа уол оҕолору балыктыырга, бултуурга уһуйаллар. Хотугу муустаах байҕал тыына иһиллэр туундара дойдулаах дьоҥҥо көмпүүтэр үйэтин сабыдыала эмиэ күүскэ биллэн эрэр эбит.
“Аҕалаах уолаттар балыкка-булка сылдьыһар буоллахтарына, аҥаардас ийэлээхтэр дьиэҕэ хаайтаран, көмпүүтэртэн атыны билбэттэр, — диир оскуола дириэктэрэ Михаил Нестеров. – Онон, чуолаан, маннык оҕолору айылҕаҕа чугаһатар, эр киһилии иитэр инниттэн бөһүөлэктэн 2 көстөөх Арыылаах күөлгэ сир ылан, балыкка илимнииргэ үөрэтэбит. Ону тэҥэ сантехникпыт Павел Попов урут табаһыттаабыт, кадровай булчуттаабыт буолан, быйылгы үөрэх дьылыттан X кылаас уолаттарын кырсаҕа сохсо (анаабырдыы “паас”) иитэргэ уһуйан эрэр”.
Павел Трифоновиһы бэйэтин көрсөн кэпсэппиппэр: “Быйыл кыһын 5 паастан (сохсо — аапт.) уонча кырсаны ыллыбыт”, — диэтэ. Былырыын саас 10 паас маһын бэлэмнээбиттэрин аҥаарын улахан халаан уута илдьэ барбыт. Бултарын тириитэ таҥас буолан (оскуолаҕа кыргыттар сэлиэччик тигиэхтээхтэр) харчыга турдаҕына, аны күһүн сохсолорун элбэтэр баҕалаахтар. Байбал эдэригэр биир сезоҥҥа, муҥутаан, 50-ча кырсаны бултуур, бастыҥнар 200-чэҕэ тириэрдэллэр эбит. Билигин бөһүөлэктэн ырааппакка, суотабай төлөпүөн хабар сиригэр сылдьаллар. “Кырса муора диэки эмис. Бөһүөлэк чугаһынааҕылар көтөх буоланнар, пааска түбэспити нэдиэлэҕэ тириэрдибэккэ, бэйэлэрэ сиэн кэбиһэллэр”, — диэн кэпсиир эдэр булчуттары уһуйааччы.
Василий НИКИФОРОВ, edersaas.ru