Софрон Чахов: «Биир үөлээннээхтэрим быыбарга көхтөөхтүк кыттыахтара диэн эрэнэбин»
Көмүс күһүммүтүн кытары быйылгы быыбарбыт бу тиийэн кэллэ. Быйылгы тэрээһиҥҥэ кыттаары сылдьар дьон санааларын ааһан, бастаан хайдах-туох быыбардаабыттарын ыйыталастыбыт.
Софрон Чахов, М.К. Аммосов аатынан ХИФУ юридическай факультетын 3-с кууруһун устудьуона:
– Биһиги оҕо эрдэхпититтэн быыбар диэн тугун билэбит. Оскуолаҕа лиидэри таларбыт, билигин институт, университет идэлээх сойуустарын бэрэссэдээтэллэрин эмиэ куоластаан талабыт. Мин быыбарга кыттар буоллахпына, миигин судаарыстыба истэр, санаабын учуоттуур, убаастыыр диэн өйдүүбүн. Олохтоохтор былаас үлэтигэр үрдүк суолталаахтарын, улахан хамсааһыны оҥороллорун илэ көрөбүт, итэҕэйэбит.
Күннээҕи да олоххо биһиги куруутун талар, ордугу, үчүгэйи бэлиэтиир буоллахпыт дии. Онон ыччат дьон, биир үөлээннээхтэрбин, барыгытын буолаары турар быыбарга көхтөөхтүк кыттыахха диэн ыҥырабын.