Сахабыт сирин тымныы кыһына араас эспэримиэннэри ыытарга, саҥаны айарга дьиҥнээх ырай! Куйаар ситимигэр, ордук социальнай ситимнэринэн, биир дьикти ырысыап тарҕанан дьону сөхтөрдө – хаарга оҥоһуллар мороженай. Үс эрэ ингредиентан турар, оҥорорго судургу, оттон амтана – дьиҥнээх сэбиэскэй кэминээҕи пломбиртан туох да уратыта суох.
Туох нааданый?
- Тымныы сүөгэй (33–35% сыалаах, хайаан да олус тымныы буолуохтаах) – 1 ыстакаан;
- Саахар пудрата – 2-3 улахан ньуоска (бэйэҥ көрөн кут).;
- Ванилиннаах саахар – 1 кыра ньуоска (сыта-амтана тупсарыгар);
- Туус (бу кистэлэҥ ингредиен).
Хайдах оҥоробут?
Бастаан, таһырдьа тахсан, ыраас, үчүгэйдик тоҥмут хаарга иһиппитин тимирдэн, миэстэтин оҥоробут. Хаарга, иһиппит миэстэтигэр, аҕыйах тууһу кутабыт. Тоҕо? Туус хаары өссө күүскэ тоҥорор, температуратын түһэрэр. Онон мороженайбыт түргэнник хойдор уонна кытаатар. Туус үрдүгэр дириҥ иһиппитин уурабыт. Иһиппитигэр тымныы сүөгэйбитин кутабыт. Үрдүгэр саахар пудратын уонна ванилиннаах саахары эбэбит. Онтон венчигынан тохтоло суох, күүскэ ытыйан саҕалыыбыт — 15-20 мүнүүтэ курдук ытыйабыт. Устунан сүөгэйбит хойдон, дьиҥнээх мороженайга кубулуйан барара дьикти көстүү!
Сүөгэйгит үчүгэйдик хойдон, ньуоскаттан түспэт буолла да, дьэ, киһини сөхтөрөр минньигэс, нарын амтаннаах мороженайгыт бэлэм. Амтана – оҕо сааһы санатара дьиҥнээх пломбир курдук.
Сакалааттаах оҥоруоххун баҕардаххына, сүөгэйгэ биир ньуоска какао эбэн биэриҥ. Ону таһынан бэлэм буолбут мороженайга бытарытыллыбыт сакалааты эбэтэр бэчиэнньэ кутан буккуйуҥ. Ону кытта сибиэһэй, тоҥ отону (уулаах отон, голубика) эптэххинэ, өссө тупсуо. Минньигэстик аһааҥ! Доҕотторгутун күндүлээҥ!