Өлөөнтөн – Сочига: Табаһыт, режиссер, ыччат лидерэ уонна спортсмен Ыччат бэстибээлигэр кытталлар
Бэҕэһээ дойду бэрэсидьиэнэ Владимир Путин Сочига Ыччат уонна устудьуоннар аан дойдутааҕы бэстибээллэрин үөрүүлээх арыллыытын чааһыгар ыалдьыттаата. Манна Саха сирин аатыттан 150 көхтөөх ыччаты кытта 30 волонтер тиийдилэр. Делегаттар истэригэр Өлөөн улууһуттан түөрт ыччат баар. edersaas.ru
Юрий Ефимов — “Оленек синема” оҕо куруһуогун салайааччы, режиссер. Кини маннык улахан таһымнаах тэрээһиҥҥэ Саха сирин айар эйгэтин билиһиннэрэ сылдьарыттан олус үөрэр. “Саха киинэтэ хаачыстыбалаах саҥа таһымҥа тахсыан баҕарабын, биһиги киинэбит туһунан аан дойду бүттүүнэ билиэн баҕарабын”, — диэн санаатын үллэстэр.
Өлөөнтөн сылдьар табаһыттар аан дойдутааҕы үһүс конгресстарын иһинэн ыытыллыбыт көлүүлээх табаны сүүрдүүгэ чөмпүйүөнэ Петр Федоров “Экология” хайысхаҕа үлэлии сылдьар. Петр — бөрөнү бултааһыҥҥа үрдүк көрдөрүүлээх булчут уонна удьуор табаһыт эбит. “Уһун айаны айаннаан Сочига үктэнним. Табанан, бураанынан, бөртөлүөтүнэн, сөмөлүөтүнэн айаннаан кэллим”, — диэн Петр кэпсиир.
Өлөөн ыччатын лидерэ Мария Караваева былырыын ыытыллыбыт “Арктика ыычата” форумҥа ситиһиилэнэн бэстибээлгэ кыттар путевканы туппут эбит. Кини омук ыччатыгар бэйэтин улууһун туһунан кэпсиир, сэһэргиир кыахтаммытыттан олус үөрэр: “Биһиги Өлөөнтөн хас даҕаны бырайыактаах кэллибит. Арктика сиригэр-уотугар этнотуристическай бааза туһунан кэпсиэхпит”, — диир.
Өлөөн ыччатын кытта өссө Айсен Семенов баар. Айсен аан дойдутааҕы мас тардыһыы былаһааккатын тэрийсэ, онно үлэлии-хамныы сылдьар. Өлөөн көхтөөх ыччатыгар ситиһиилэри баҕарабыт! edersaas.ru